नेपालभाषा पाठवाचन धेँ धेँ बल्ला कासाय् निकिता बोलाखे न्हाप लात

यल । यल नेपालभाषा सहजकर्ता पुचःया ग्वसालय् अष्टमाया बाबुकाजी स्मृति प्रतिस्थान ग्वाहालिइ नेपालभाषा पाठवाचन व अष्टमाया बाबुकाजी सिरपा ११४५ ज्याझ्वः अषाढ १४ गते अशोक पार्टी प्यालेसल, बालिफल क्वचाल ।

नेपालभाषा सहजकर्ता पुचःया ल्यु छ्याञ्जे रचना महर्जन लसकुस न्वचु तयादिगु ज्याझ्वलय् यल महानगरपालिका प्रवक्ता सामजिक कल्याणया कजि लिसें नगरप्रवक्ता राजु महर्जनं त्वाः देवाय् मतः च्याका न्ह्यागु ज्याझ्वः नेपालभाषा स्यनामि गंगा बज्राचार्यं ज्याझ्वः न्ह्याकादिगु खः । अथेहे  अष्टमाया बाबुकाजी स्मृति फाउण्डेसनया दुजःपिसं अष्टमाया बाबुकाजीं किपातय्  स्वां दाताया छेँजःलिसें पाहाँपिसं सुखावति भुवनय् बासः लायेमाः धकाः कामना यानादिल ।

नेपालभाषाया शैक्षिक ख्यःया इतिहासय् न्हापांगु खुसिइ जूगु  पाठ वाचन धेँ धेँ बल्ला कासाय्  ३६ खुगू ब्वनेकुथिया ब्वनामिपिसं ब्वति कयादिगु उगु ज्याझ्वलय् न्हापांगु ब्वय् नं उत्कृष्ट झीम्ह ल्यः ज्या यानाः दिगु खः ।  लिपांगु ब्वय् झीम्हेसिगु दथ्वी धेँ धेँ बल्ला यानादिगु जुल ।  सकल ब्वनामिपिसं तसकं बांलाक्क पाठ वाचन यानाः सकल स्वकूमिपिनिगु नुगः त्याकेत ताः लाःगु खः ।

अथेंसान उत्कृष्टताया लिधंसाय् ब्वनामिपिन्त अष्ट माया फाउण्डेशनया प्रमुखं बाबुराजा महर्जनं छसिकथं न्हाप लाकादिम्ह श्री मिननाथ आदर्श शिक्षा सदन माविया स्यनामि विना महर्जनया ब्वनामि नीकिता बोलाखेयात  सिरपाः कथं ३५००÷— तकाः दां , ल्यू श्री ललित विकास मा.वि. या स्यनामि रविना मर्हजनया  ब्वनामि पिंकी कुमारीयात ३०००÷— तकाः दां  व लिया ल्यू श्री टीका विधाश्रम माविया स्यनामि ममता अवालेया ब्वनामि गोबिन्द भट्टयात २५००÷— दां लः ल्हानादिल ।

अथेहे उत्कृष्टताया  लिधंसाय्  श्री सचेतना आ वि, सन्जु बज्राचार्यया ब्वनामि सकृय लामा, श्री श्रमिक शान्ति माविया गंगन बज्राचार्यया ब्वनामि खुशी कुमारी चौधरी, श्री जल्पा मावि,निर्मला राजपुतया ब्वनामि रोजिना सुनार,  श्री पद्म प्रकाश मावि, ऋतु महर्जनया  ब्वनामि इशिता विक, श्री जनउदय मावि, स्यनामि पवित्र कुमार महर्जनया ब्वनामि रोजी लामा श्री बालकुमारी मावि, स्यनामि सृजना महर्जनया ब्वनामि पार्वती तामांग, श्री कृषि उदय मावि, उपा सिं महर्जनया  ब्वनामि कविता मगर यात २०००÷— तकाः दां लिसें सिरपा, दसिपौं, सुभाय् पौं लः ल्हानादिल ।

नेपालभाषा ब्वनामिपिनिगु व्यक्तित्व विकास व नेपालभाषा संरक्षण सम्बर्द्धन प्रवर्द्धन यायेगु मु आज्जु ज्वना ग्वसाः ग्वःगु ज्याझ्वःया निर्णायकया भुमिका भाषाविद् विष्णु चित्रकार व निर्णायक नेपाल प्राज्ञ प्रतिष्ठान अध्यक्ष अगिब बनेपालिं मूवंगु भूमिका म्हितादिगु खः ।

ज्याझ्वःया पाहाँ सह प्रा. सफू पिथना कवः कजि तुल्सी लालसिंजु यल महानगरपालिकाय् दुने नेपालभाषां आखः ब्वंकादिइपिं स्यनामिपिं एक सय एक जूगु धकाः स्यनामिपिनिगु  चर्चा यानादिल । ब्वनामिपिनिगु बौद्धिक विकासया नितिं यानादिगु थुगु अतिरिक्त ज्याझ्वः तसकं च्वछाय् बह जूूगुु धयादिल । नेपालभाषा स्यनामिपिनिगु शिक्षण विधि ज्या गन तक्क थ्यना च्वन धकाः जाँच यायेगु नितिं थुगु ज्याझ्वः तसकं मूवंगु भूमिका म्हितादिगु न्ह्यथनादिल ।

पाहाँ अष्टमाया फाउण्डेशनया प्रमुख बाबुराजा महर्जनं “नेपालभाषा विषय यल जिल्लाय् जक मखु स्वनिगःया न्यंक मेमेगु जिल्लाय् नेपालभाषा ब्वनेकुथि दुथ्याकेत ताः लाइगुलिं थः आशावादी जूगु धयादिल । वय्कलं  झीगु मांभाय् न्ह्याबले म्वाकाः तयेगु सकलसिन्ह स्यूसानं थौंकन्हय् झीगु मांभाय् मस्तय्सं खं ल्हायेगु त्वःता वनाच्वंगु इलय् सकल मांभाय् ह्यःमिं, स्यनामिपिसं मदिक्क पलाः तया च्वन धाःसा मांभाय् न्ह्याबले म्वानाच्वनेगु धयादिल ।  थुज्वःगु पुण्य ज्याय् जिम्ह मदुम्ह अबु बाबुकाजी र अष्टमायायापाखें सिरपा बिइगु ह्वःता चुलाकादिइगुलिं ग्वसाः खलःयात दुनुगुलंनिसें सुभाय् देछासें मांभाय् ल्यंके ज्याय् थःगु न्ह्याबले पासा दयाच्वनेगु” बंच प्वंकादिल ।

नेवाः देय् दबूपाखें पाहाँ कथं झायादिम्ह सरल गोपाल महर्जनं ख्वनाय् पन्चायतकालय् नेपालभाषाया ज्याझ्वः याके मबिइगु पुलिसं घेरेलगे यानाः दुखः बिइगु खं कनादिल ।  गुबले देशय् बहुदल वसा तबि नेपालभाषं आखः ब्वंकेगु थौतक खासै छुं हे व्यवस्था मयागु जुसान  थौंकन्ह्य स्थानीय तहलय् नेपालभाषा आखः ब्वंकेगु ह्वःताः चुलाना च्वंगु ह्वःतायात सरकारी ब्वनेकुथिई जक मखु नीजि प्राइभेट ब्वनेकुथिई नेपालभाषा भाषं आखः ब्वंकेगु ताः लाकेत फत धाःसा जक झीगु कला, संस्कृति व भाषा संरक्षण जुइगु धयादिल । 

ज्याझ्वः पाहाँलिसें निर्णायक भाषाविद् बिष्णु चित्रकारं थौं जित तसकं लय्तावल छाय् धाःसा जि थन मस्तये पाखें गुगु जिं न्यना झिम्ह जखु स्वीप्यंम्ह ब्वनामिं सकलसिन्ह उलिहे बांलाक्क ब्वनादिल । वय्कपिं मस्त अधिकाशं नेवाः मखूपिं खः । नेवाः मखुसानं बांलाक्क नेवाः भासं  नेवाः भासं ब्वनेतःगु ब्वनादिल, उकि मध्ये तसंकं बालांलक्क ब्वनादिल धायेमाः । उकि मध्ये सकल सिन्ह ब्वन, गुलिसिन्ह सिरपाः कायेत ताः लात थुगु ज्याय् यायेदत थुकिया श्रेय यल महानगरयात बिइमा । थथें नेपालभाषा सयेका नेपालभाषा  पाठ वाचन यानादिल । थुकिया देन यल महानगरपालिकायात बिइहेमाः सकल मस्तय्सं बांलाक्क नेवाः भाय् सिइका च्वंगु थुकि प्रमाणित जूगु दु । 

थौंकन्ह्य नेपालभाषा र तामांग भाषायात काम काजी भाषाका रुपय्  कार्यान्वयन जुइ धुंकूगु दु । थिमी नगरपालिका, चन्द्रागिरि नगरपालिकाय्  लगायत मेमेगु नगरपालिकाय् नं नेपालभाषा दुथ्याकेत सकलसिगु मंकाः कुतः यायेमाःगु दु धयादिल । लिसें नेपालभाषा  स्थानीय विषय जूगु लिधंसाय् अनिवार्य याकेत सकलें हाकनं छक्वः  सकले जानाः संर्घष यायेमालाः वःगु खँय् ध्यानाकर्षण यानादिल ।

ज्याझ्वलय् पाटन क्याम्पसया नेपालभाषा केन्द्रिय विभागया नेपालभाषा उप्रा. लिसें सफू पिथना कवः दुजः जिवन कुमार महर्जन, क्लासिक जेम प्रोपाईटर कृष्णलाल महर्जन, आरबि डाइमण्डपाखें सरिता महर्जन, येँ नेपालभाषा स्यनामि पुचः प्रतिनिधि विद्या चित्रकार, लगायतपिसं  नं ब्वति कयादिगु खः ।

उगु ज्याझ्वःया मूपाहाँ  सामाजिक कल्याणया संयोजकलिसें नगर प्रवत्ता राजु महर्जनं “थौंकन्ह्य यल महानगरापालिका स्वंगू तगिं तक्क नेपालभाषा स्यनेकने यानाः वयाच्वंगु जुया आ प्यंगू तगिंया पाठ्यक्रम तयारी जुइ धुंकूगु,  सफू न्यानाकायेगु व ब्वनेकुथि  ध्यबा फ्यायेगु ज्या जुइ धुंकूगुलिसें यल नगरय् झिन्याम्ह दुजःया नेपालभाषा अनुगमन कमिटी दयेकेज्या जुयाच्वंगु जानकारी बियादिल । यल महानगरं अनिवार्य कथं ब्वंकेमाःगु जुया संस्थागत ब्वनेकुथि च्यम्हसिबें अप्वः स्यनामिपिन्त नेपालभाषा गथे याना सयेकीगु व सिइकेगु धयागु तालिम निगु वाः न्ह्य बियागु खँ कनादिल । 

अथेहे संस्था  अष्टमाया बाबुकाजी  फाउण्डेसनया नेतृत्वय्  शिक्षा, भाषा क्षेत्र लगायत थीथी ख्यलय् मानवीय भावना ब्वंलकाः ज्यायाना वयागु तसकं च्वछाय् बहूगु जूगु दु लिसें सकले नेवाः समुदायया हक, हितया नितिं दक्वसिनं पलाः तयादिइमाःगु  खँय् बहः बिसें कासाय्  सिरपाः कायेतः ताः लाकादिइपिं सकल ब्वनामि ग्वासाः खलः पिन्त आपालं  भिंतुना देछनादिल ।

सभापति पवित्रकुमार महर्जनं प्रा. तुल्सीलाल सिंहया परिकल्पना कथं नेपालभाषा पाठ वाचन ज्याझ्वः यानादिगु खं कसें ज्याझ्वः ताःलाकादिइपिं सकलसित सुभाय् देझाना ज्याझ्वः क्वचायेकादिल ।