सुर्द्यःया जः संस्कृतिविद् डा. सत्यमोहन जोशी

बखुंबहाः, यल

ओतां सुर्द्यः लुयावयाच्वन,

 व हे सुर्द्यः योताय् लुकुबिना वनाच्वन ।

 गुलि युग वनेधुंकल जुइ,

 गुलि युग वयावं च्वनितिनिजुइ ।

 सुर्द्यः लुयावंच्चन,

 सुर्द्यः लुकुबिनावंच्वन ।

 सुर्द्यः ल्वीवं न्हि,

 सुर्द्यः बीवं चा, 

न्हि व चाया कम नं

पालंपाः न्ह्यानावंच्वन 

जिगु मिखाय्

न्हिं छम्ह सुर्द्यः लुयावयाच्वं थें 

जिगु मिखाय्

न्हिं छम्ह सुर्धः लुकुबिनावनाच्वं थें 

जिगु मिखाय्

ओताया कुलामय् 

न्हिं छगः खँय् थ्वइम्ह माखा दु थें 

जिग् मिखाय्

योताया कुलामय् 

न्हिं छगः खँय् नुनीम्ह यमराज दु थें ।

सुर्द्यः गुलि च्वय्लाः, 

सुर्द्यः उलि हे तापाः । 

सुर्द्यःया जः गुलि लुमु 

सुर्द्यःया जः मन्तकि उलि हे बुलु । 

अले जिगु मिखाय् दुनेच्वंगु गुलि

सुर्द्यःया हे जःफुति ला धइथें  

न्हि वं चाः, दॅ वं मचाः,

जीवन न्ह्यानावं च्वन ।

छन्हु ल्वचं थीवं 

जिगु क्वथां जितः नेवलं न्ह्याकल । 

भ्वाबः ज्वीधुंकूगु जिगु म्ह 

गंगु स्वांमा थें जुल हा चनाः  

छखे जिगु सञ्चित पुण्यं जितः 

स्वर्गस यंकेगु धकाः सुचं बियाच्वन, 

मेखे जिग पापकर्म जितः

नर्कया लुखा द्वाः चायेकाः क्यनाच्वन ।

छन्हु चिकुलाया ई 

सनिलय् सुर्द्यः लुकुबीत्यंगु,

जिगु बः चाधंगु क्वथाय् 

तिकिझ्याः प्वालं सुर्द्यःया जः छत्याः 

जिगु मिखाया न्ह्यःनेसं द्वहांवयाच्वन । 

न्ह्यनेसं च्वंगु थूचा कयाः 

व हे चाह्वतं मिखाति हे मयासे 

सुर्द्यःया जः लिसेंलिसें वनाः जिं 

सुर्द्यःयात तुंक स्वयाच्वना ।

जिगु मिखाया गुलि ला 

सुर्द्यःया जःलिसे छस्वा जुयाः 

गुलुलु वनाः सुर्द्यःयाथाय् हे थ्यंकाः प्येपुंवन । 

उथाय् हे खः जितः जि थःगु आज्जुइ 

थ्यनाच्वंम्ह थें आत्मानुभूति जूगु ।

थुपालय नं ‘टोरोन्टो नेपालभासा समर स्कुल’ न्हेज्यात

क्यानाडाया टोरोन्टो विश्वविद्यालं न्ह्याका वैचोंगु ‘टोरोन्टो नेपालभासा समर स्कुल’ थुगुसि नं वंगु सोमबार २७ मइ लिसें न्हेज्यागु दु ।

 ‘टोरोन्टो नेपालभासा समर स्कुल’ प्रोफेसर क्रिस्टोफ इमिरिचया सक्रियताय रोबेर्ट एच एन हो फेमेली फाउण्डेसन व बौद्ध अध्ययन बिभाग, टोरोन्टो बिश्वबिद्यालय गोसालय दंयदसं न्ह्याकावैचोंगु ख । क्यानाडा, अमेरिका, बेलायत, नेदरलन्द, भारत, जर्मन, इटाली, डेनमार्क लगायत देसया थीथी विश्वविद्यालय आबद्ध न्ययम्हं मल्याक विद्यार्थी, अनुसंधाता व प्राध्यापक लगायत प्रशिक्षार्थितयसं बोति कयाचोंगु थुगुसिया नेपालभासा समर स्कुल ज्याझोलय आधारभूत नेपालभाषा खंल्हाबल्हा, आधुनिक नेपालभाषा लेखन, आधुनिक नेपालभाषा साहित्य व पुलांगु (क्लासिकल) नेपालभाषा बिषयस बोंकेगु ज्या जुयावैचोंगु ख ।

 अनलाइन न्ह्यानाचोंगु थुगुसिया ज्याझोलय टोरोन्टो विश्वविद्यालया प्रा.डा. क्रिस्टोफ एमिरिक व इयान तर्नर अले नेदरलन्दं नेपालभाषाया साहित्यकार श्रीलक्ष्मी श्रेष्ठ, मानबशास्त्री व नेपालभाषाया साहित्यकार डा. बाल गोपाल श्रेष्ठपिसं प्राध्यापन यानाचोनादीगु ख । थुगुसिया नेपालभासा समर स्कुलया दथुइ दथुइ नेवा भाय बारे निगू विशेष नोचु व राउण्ड टेबल नं जुइगु दु । ज्याझो कथं जुन ३ कुन्हुं प्रा प्रेमशान्ति तुलाधर जुया नेपालभाषा साहित्यया संक्षिप्त इतिहास (Short History of Nepalbhasa Literature) नोचु नेपालभासाय व ५ जुन कुन्हुं डा कामिंलो ए फर्मिगाति जुया Maṇika and the first Manuscript Witnesses of Newar Literature" विषयसं अंग्रेजी नोचु जुइगु दु ।

 ७ जुन कुन्हुं प्रोफेसर क्रिस्टोफ इमिरिच, डा मार्लिना फ्रिसोने, डा क्रितिस राजभण्डारी, इयान तर्नर व डा बाल गोपाल श्रेष्ठया नेवा काव्य अनुवाद पुचया राउण्ड टेबल "Towards a Collectively Translated Anthology of Modern and Contemporary Newar Verse" (अंग्रेजी व नेपालभासा) नं जुइगु दु । निवा यंक जुइगु उगु ‘टोरोन्टो नेपालभासा समर स्कुल’ थो हे ८ जुनय समापन जुइगु ख ।