छन्हुं हे नेवाः देय् दबूया स्वनिगःया प्यंगू नगरपालिकाया अधिवेशन

येँ । नेवाःतय्गु मंकाःगु राष्ट्रिय संगठन नेवाः देय् दबूया वइगु चैत्र महिनाय् सुदुर पश्चिम प्रदेशया कञ्चनपुरय् वइगु चैत्र २१ र २२ गते जूवनाच्वंगु च्याक्वःगु महाधिवेशनया तयारीया झ्वलय् स्वनिगः विशेष प्रदेश अन्तर्गत दुगु स्वंगू जिल्लाय् शनिवाः माघ १२ गते छन्हुं हे प्यंगू पालिकाया अधिवेशन क्वचाःगु दु ।

 नेवाः देय् दबू स्वनिगः विशेष प्रदेशया नायो श्रीकृष्ण महर्जनं बियादीगु जानकारी कथं येँ जिल्लाया कागेश्वरी मनहरा नगरपालिकाय् न्हापांगु अधिवेशन, ख्वप जिल्लाया ख्वप नगरपालिकाय् निक्वःगु अधिवेशन व यल जिल्लाया यल महानगरपालिकाया निक्वःगु अधिवेशन व गोदावरी नगरपालिकाया निक्वःगु अधिवेशन याना प्यंगू हे पालिकाय् न्हूगु नेतृत्व ल्ययेगु ज्या जूगु दु । 

यल जिल्लाया यल महानगरपालिकाया निक्वःगु अधिवेशनं विजयराज शाक्ययात नायो कथं सर्वसम्मतं ल्यःगु दु । अथे हे बरिष्ठ न्वकू शर्मिला महर्जन, न्वकूपिं किरण महर्जन, मिली महर्जन, छ्याञ्जेपिं सुरेन्द्र महर्जन, सुलक्ष्या महर्जन, दांभरी सवर्ण महजृन अथे हे दुजलय् राम महर्जन, सुमित्रा श्रेष्ठ, भगवती महर्जन, धर्मलाल महर्जन, सनिष महर्जन, मिना महर्जन, समिकपुर महर्जन, दिनश महर्जन व मित्र महर्जन सर्वसम्मतं ल्यःगु दु । अथे हे यल जिल्लाया हे नेवाः देय् दबू गोदावरी नगर समितिया निक्वःगु अधिवेशन नं शनिवाः हे क्वचाःगु दु । उगु अधिवेशनं न्हूगु नेतृत्व ल्यःगु दु । नायो राम डंगोल, बरिष्ठ न्वकू उमेश लाल श्रेष्ठ, न्वकूपिं गजेन्द्र महर्जन, रिना माली, छ्याञ्जे शानित डंगोल, दांभरी रामलाल महर्जन व दुजलय् राजेन्द्र देशार, रमण श्रेष्ठ, दशबहादुर महर्जन, शरण महर्जन, हरि महर्जन व राजन शाही सर्वसम्मतं ल्यःगु दु । 

उगु हे कथं नेवाः दय् दबूया येँ जिल्ला अन्तर्गत दुगु कागेश्वरी मनहरा नगर समितिया नं न्हापांगु अधिवेशन जूगु दु । अधिवेशनं सन्तोष श्रेष्ठयात नापं कथं झिंप्यम्हेसिया न्हूगु नेतृत्व ल्यःगु दु । बरिष्ठ न्वकू राजेन्द्र श्रेष्ठ, न्वकूपिं अनिल श्रेष्ठ, सम्झना श्रेष्ठ, छ्याञ्जे श्रीकुमारी श्रेष्ठ, सुशान्त श्रेष्ठ, दांभरी कृष्णमान श्रेष्ठ, दुजलय् कृष्ण श्रेष्ठ, सुदिप श्रेष्ठ, बालकृष्ण नगरकोटी, दिलबहादुर श्रेष्ठ, रोहन श्रेष्ठ, रंजित श्रेष्ठ व दिपेश श्रेष्ठयात ल्यःगु दु । नेवाः देय् दबू ख्वप नगर समितिया निक्वःगु अधिवेशनं नं न्हूगु नेतृत्व ल्ययेगु ज्या जूगु दु । न्हूगु नेतृत्व कथं नायो कृष्णप्रसद प्रजापति, बरिष्ठ न्वकू मिमला शर्मा नापं याना सकल ज्यासना पुचःया दुजःपिं सर्वसम्मत कथं ल्यःगु दु ।

 नेवाः देय् दबू स्वनिगः विशेष प्रदेशं बिउगु जानकारी कथं आः तकया दुने स्वनिगः दुनेया दक्षिणकाली नगर समिति, गोकर्णेश्वर नगर समिति, तोखा नगर समिति, येँ महानगर समिति, महालक्ष्मि नगर समिति, बुढानिलकण्ठ नगर समितिया नं अधिवेशन क्वचायेका न्हूगु नेतृत्व ल्यायेगु ज्या जुइ धुंकूगु दुसा ल्यंदुगु नगर समिति नापं स्वंगू हे जिल्ला समितिया अधिवेशन नं याकनं हे जुइ ।