𑐀𑐖𑐸 𑐔𑐵𑐮

𑐀𑐖𑐸 𑐔𑐵𑐮

𑐩𑑀𑐟𑐶𑐱𑐵𑐣𑑂𑐟𑐶 𑐱𑐵𑐎𑑂𑐫

𑐡𑐶𑐣𑐸𑐫𑐵 𑐩𑐵𑑄 , 𑐠: 𑐀𑐧𑐸 𑐣𑐵𑐥𑐮𑐵𑐫𑐟 𑐳𑐣𑐶𑐮𑐫𑑂 𑐠: 𑐕𑐾𑑄𑐫𑑂 𑐰𑐣𑐾𑐟𑑂𑐫𑑄𑐧𑐮𑐫𑑂 , 𑐐𑐧𑑂𑐮𑐾𑑄 𑐖𑐶𑐡𑑂𑐡𑐷 𑐩𑐫𑐵𑐂𑐩𑑂𑐴 𑐩𑐵𑑄𑐫𑐵𑐐𑐸 𑐏𑑄 𑐧𑐵𑑄𑐮𑐵𑐎𑑂𑐎 𑐠𑐸𑐩𑑂𑐴 𑐡𑐶𑐣𑐸 𑐖𑐶𑐡𑑂𑐡𑐷 𑐫𑐵𑐣𑐵 𑐩𑐵𑑄𑐩𑑂𑐴𑐾𑐳𑐶𑐫𑐵 𑐮𑑂𑐫𑐹 𑐮𑑂𑐫𑐹 𑐰𑑄 𑐴𑐾 𑐰𑐣 𑑋 𑐀𑐧𑑂𑐮𑐾 𑐮𑐵𑐎𑑂𑐎 𑐳𑐟𑐎𑐫𑑂 𑐎𑐵𑐬𑐵𑐎𑑂𑐎 𑐳: 𑐰𑐮 𑑋 𑐣𑐶𑐩𑑂𑐴𑐾𑐳𑐶𑐫𑐵𑑄 𑐮𑐶𑐦: 𑐳𑑂𑐰𑐮 𑑋 𑐕𑐩𑑂𑐴 𑐩𑐶𑐳𑐵 𑐮𑐵 𑐥𑑂𑐫𑐟: 𑐖𑐵𑐐𑐸 𑐕𑐾𑑄𑐫𑐫𑐵 𑐎𑐳𑐶𑑄𑐂 𑐎𑐸𑐟𑐸𑑄 𑐰𑐫𑐵 𑐮𑐵𑐕𑐷𑐂 𑐧𑐖𑑂𑐬𑐫𑑂 𑐖𑐸𑐐𑐸 𑐏𑐣𑐷 𑑋 𑐠𑑂𑐰: 𑐡𑐺𑐲𑑂𑐫 𑐣𑐶𑐩𑑂𑐴𑐾𑐳𑐶𑐣𑐣𑑄 𑐧𑐵𑑄𑐮𑐵𑐎𑑂𑐎 𑐏𑐣 𑑋 𑐐𑐧𑐵𑐫𑐟 𑐟𑐎 𑐄𑐩𑐶𑐳𑑄 𑐕𑐸𑑄 𑐣𑑂𑐰𑑄 𑐰𑐵𑐫𑑂 𑐩𑐦𑐹 𑑋 𑐕𑑂𑐫𑐣𑑄 𑐴𑐷 𑐧𑐵𑐴𑐵 𑐰𑑄𑐐𑐸 𑐏𑑄𑐎𑐵 𑐡𑐶𑐣𑐸𑐫𑐵 𑐩𑐵𑑄 𑐴𑐵𑐮 –

“ 𑐴𑐾 𑐨𑐐𑐰𑐵𑐣 𑐠𑑂𑐰: 𑐕𑐸 𑐖𑐸𑐐𑐸 ! 𑐩𑐣𑑂𑐟 𑐠𑐾𑑄 𑐔𑑂𑐰𑑄 “

𑐩𑐵𑑄𑐫𑐵 𑐥𑐬𑑂𑐳𑐶 𑐔𑑂𑐰: 𑐖𑑂𑐰𑐣𑐵 𑐠𑐬𑐠𑐬 𑐏𑐵𑐎𑐵 𑐔𑑂𑐰𑑄𑐩𑑂𑐴 𑐡𑐶𑐣𑐸𑐫𑐵𑐟 𑐩𑐵𑑄𑐩𑑂𑐴 𑐣𑑂𑐰𑐵𑐟 – “ 𑐰𑐫𑐾𑐩𑐟𑐾 𑐢𑐵𑐫𑐎 𑐰𑐮 , 𑐏𑐣 𑐩𑐏𑐸𑐮𑐵 “

𑐩𑐵𑑄𑐩𑑂𑐴 𑐠𑐸𑐮𑐶 𑐖𑐎 𑐕𑐸 𑐢𑐵𑐮 , 𑐡𑐶𑐣𑐸𑐫𑐵 𑐣𑐸𑐐𑐮𑐫𑑂 𑐟𑑂𑐬𑐵𑐳 𑐣𑐵𑐥 𑐣𑐵𑐥𑑄 𑐥𑐱𑑂𑐔𑐵𑐟𑐵𑐥 𑐣𑑄 𑐥𑐶𑐖𑑂𑐰𑐮 𑑋 𑐀𑐮𑐾 𑐴𑑂𑐰𑐵𑑃𑐫𑑂 𑐴𑑂𑐰𑐵𑑃𑐫𑑂 𑐏𑑂𑐰𑐫𑐵 𑐩𑐾𑐐𑐸 𑐮𑑄𑐥𑐸 𑐖𑐸𑐫𑐵 𑐕𑐾𑑄𑐫𑑂 𑐮𑐶𑐴𑐵𑑄 𑐰𑐮 𑑋

𑐕𑐾𑑄𑐫𑑂 𑐠𑑂𑐫𑑄𑐎𑐵 , 𑐳𑐎𑐮 𑐕𑐾𑑄𑐫𑑂 𑐖: 𑐥𑐶𑐣𑐶𑐐𑐸 𑐣𑑂𑐴𑑂𑐫𑑀𑐣𑐾 𑐖𑐶𑑄 𑐫𑐵𑐣𑐵 𑐕𑐩𑑂𑐴 𑐩𑐶𑐳𑐵 𑐎𑐳𑐶𑑄 𑐎𑐸𑐟𑐸𑑄𑐰𑐮 𑐢𑐎𑐵 𑐡𑐶𑐣𑐸 𑐴𑐶𑐴𑐶𑐮𑐮𑑄 𑐏𑑂𑐰𑐮 𑑋 𑐠𑑂𑐰: 𑐩𑐔𑐵𑑄 𑐕𑐸 𑐢𑐵𑐐𑐸 𑐢𑐎𑐵 𑐠𑐸𑐂𑐎𑐾 𑐩𑐦𑐸𑐟 𑑋 𑐀𑐧𑑂𑐮𑐾 𑐮𑐵𑐎𑑂𑐎 𑐩𑐵𑑄𑐩𑑂𑐴𑑄 , 𑐠: 𑐕𑐾𑑄𑐫𑑂 𑐴𑐾 𑐩𑐰𑑄𑐳𑐾 𑐮𑐶𑐴𑐵𑑄 𑐰𑐫𑐵 𑐕𑐾𑑄 𑐖: 𑐥𑐶𑐣𑑂𑐟 𑐖𑐸𑐐𑐸 𑐑𑐚𑐣𑐵𑐫𑐵 𑐧𑐵𑐬𑐾 𑐧𑐺𑐟𑐵𑐣𑑂𑐟 𑐎𑐣𑐾 𑐎𑑂𑐰𑐔𑐵𑐫𑑂 𑐩𑐮𑐵𑐫𑐰𑑄 𑐡𑐶𑐣𑐸 𑐩𑐵𑑄𑐩𑑂𑐴𑐾𑐳𑐶𑐟  𑐑𑐫𑐥𑐸𑐣𑐵 “ 𑐖𑐶𑑄 𑐩𑐵𑑄𑐫𑐵𑐐𑐸 𑐏𑑄 𑐩𑐣𑑂𑐫𑐣𑐵𑐐𑐸𑐮𑐷𑑄 𑐰 𑐩𑐶𑐳𑐵 𑐎𑐳𑐷𑑄𑐂 𑐎𑐸𑐟𑐸𑑄 𑐰𑐐𑐸 𑐏: 𑐖𑐶 𑐩𑐰𑐳𑐵 𑐎𑐸𑐟𑐸𑑄 𑐰𑐿𑐩𑐏𑐸𑐐𑐸 “ 𑐢𑐎𑐵 𑐗𑐣 𑐏𑑂𑐰𑐮 𑑋 𑐩𑐔𑐵𑐫𑐵 𑐢𑐵𑐥𑐹 𑐣𑑂𑐫𑐾𑐣𑐵 𑐳𑐎𑐮𑐾𑑄 𑐀𑐖𑐸 𑐔𑐵𑐮 𑑋 𑐀𑐮𑐾 𑐳𑐎𑐮 𑐥𑐬𑐶𑐰𑐵𑐬𑑄 𑐡𑐶𑐣𑐸𑐫𑐵𑐟 𑐴𑐾𑐫𑐎𑐮 𑑋 𑐳𑐸𑐫𑐵𑐐𑐸 𑐣𑑄 𑐰 𑐑𑐚𑐣𑐵𑐫𑑂 𑐡𑑀𑐲 𑐩𑐡𑐸 𑐢𑐎𑐵 𑐳𑐩𑑂𑐗𑐾𑐫𑐵𑐟 𑑋 𑐰 𑐮𑐵 𑐕𑐟𑐵: 𑐡𑐸𑐬𑑂𑐑𑐚𑐣𑐵 𑐖𑐎 𑐏: 𑐢𑐎𑐵 𑐡𑐶𑐣𑐸𑐫𑐵 𑐎𑑂𑐫𑐵𑐟𑐸𑐐𑐸 𑐧𑐵𑐮 𑐩𑐣𑑀𑐨𑐵𑐰𑐫𑐵𑐟 𑐳𑐵𑐣𑑂𑐟𑑂𑐰𑐣𑐵 𑐧𑐶𑐂𑐐𑐸 𑐎𑐸𑐟: 𑐫𑐵𑐟 𑑋 𑐄𑐎𑐸𑐣𑑂𑐴𑐸 𑐡𑐶𑐣𑐸 𑐴𑐶𑐎𑐸𑐴𑐶𑐎𑐸 𑐮𑑄𑐎 𑐏𑑂𑐰𑐏𑑂𑐰𑑄 𑐕𑐸𑑄 𑐴𑐾 𑐩𑐣𑐳𑐾 𑐡𑑂𑐫𑐣 𑑋 𑐎𑐣𑑂𑐴𑐾 𑐎𑐸𑐣𑑂𑐴𑐸 𑐳𑐸𑐠𑐫𑑂 𑐣𑑂𑐴𑑂𑐫𑐮𑑄 𑐔𑐵𑐫𑐰𑑄 𑐡𑐶𑐣𑐸𑐫𑐵 𑐩𑐶𑐏𑐵𑐫𑑂 𑐰 𑐴𑐾 𑐡𑐺𑐲𑑂𑐫 𑐥𑑂𑐫𑐥𑐸𑑄𑐰𑐮 𑑋 𑐩𑐶𑐳𑐵 𑐧𑐖𑑂𑐬𑐾 𑐖𑐸𑐐𑐸 𑐳: 𑐖𑐎 𑐣𑑂𑐴𑐵𑐫𑐥𑐣𑐫𑑂 𑐡𑐶𑐣𑐵 𑐔𑑂𑐰𑐣 𑑋 𑐀𑐮𑐾 𑐰𑐵𑐠𑐵𑐎𑑂𑐎 𑐡𑐣𑐵 𑐩𑐶𑐳𑐵 𑐎𑐸𑐟𑐸𑑄 𑐰𑑄𑐐𑐸 𑐠𑐵𑐳𑐫𑑂 𑐰𑐣 𑑋 𑐩𑐶𑐳𑐵 𑐮𑐵 𑐩𑑂𑐰𑐵𑐟 𑐟𑐬 𑐴𑑀𑐳𑐫𑑂 𑐩𑐰𑐣𑐷 𑑋 𑐰 𑐩𑐶𑐳𑐵 𑐀𑐳𑑂𑐥𑐟𑐵𑐮𑐫 𑐟𑐶𑐣𑐷 𑐢𑐎𑐵 𑐰𑑄 𑐳𑐶𑐂𑐎𑐮 𑑋 𑐄𑐎𑐸𑐣𑑂𑐴𑐸 𑐣𑑄 𑐡𑐶𑐣𑐸 𑐣𑑂𑐴𑐶𑐔𑑂𑐕𑐷𑑄 𑐨𑐸𑐐𑑂𑐮𑐸𑑄 𑑋 𑐳𑐸𑐣𑐵𑐥𑑄 𑐣𑑄 𑐣𑑂𑐰 𑐩𑐰𑐵: 𑑋 𑐧𑐵𑑄𑐮𑐵𑐎 𑐣𑐳𑐵 𑐣𑑄 𑐩𑐣 𑑋 𑐏𑑂𑐰𑐵: 𑐏𑑂𑐫𑐹𑑄 𑑋 𑐀𑐠𑐾 𑐖𑐸𑐐𑐸𑐮𑐶𑑄 𑐩𑐵𑑄𑐩𑑂𑐴𑐾𑐳𑐶𑐫𑐵 𑐩𑐔𑐵 𑐳𑐵𑐟𑐸 𑐖𑐎𑑄 𑐰𑐣𑐮𑐵 𑐢𑐎𑐵 𑐎𑐶𑐳𑐮𑐷 𑐕𑐴: 𑐨𑐵𑐐𑐷 𑐫𑐵𑐎𑐵 𑐥𑐮𑐶𑐂 𑐟𑐫𑐵 𑐧𑐶𑐮 𑑋 𑐩𑐵𑑄𑐩𑑂𑐴 , 𑐡𑐶𑐣𑐸𑐫𑐵𑐟 𑐎𑐳𑐶𑐎𑑂𑐎 𑐑𑐫𑐥𑐸𑐣𑐵 𑐩𑐣𑑀𑐰𑐮 𑐧𑐮𑑂𑐮𑐵𑐎𑐾𑐐𑐸 𑐎𑐸𑐟: 𑐫𑐵𑐟 𑑋 𑐡𑐶𑐣𑐸𑐫𑐵 𑐡𑐵𑐖𑐸𑑄 𑐣𑑄 𑐠: 𑐎𑐾𑐴𑐾𑑄𑐫𑐵𑐟 𑐴𑐵𑐫𑐾𑐎𑐵 𑐣𑑂𑐴𑐶𑐎𑐾𑐟 𑐫𑐎𑑂𑐰 𑐎𑐸𑐟: 𑐫𑐵𑐟 𑐟𑐬 𑐣𑑂𑐴𑐶𑐂𑐎𑐾 𑐩𑐦𑐹 𑑋

𑐡𑐶𑑄 𑐧𑐶𑐣𑐵𑐰𑑄 𑐰𑐣 𑑋 𑐎𑐳𑐶𑑄 𑐎𑐸𑐟𑐸𑑄𑐰𑐩𑑂𑐴 𑐩𑐶𑐳𑐵𑐫𑐵 𑐴𑐵𑐮𑐔𑐵𑐮 𑐳𑐶𑐂𑐎𑐾𑐟 𑐡𑐶𑐣𑐸 𑐣𑑂𑐴𑐶𑐫𑐵 𑐣𑑂𑐴𑐶𑐠𑑄 𑐰 𑐴𑐾 𑐎𑐸𑐟𑐸𑑄 𑐰𑐐𑐸 𑐠𑐵𑐳𑐫𑑂 𑐡𑐸𑐐𑐸 𑐎𑐶𑐬𑐵𑐣𑐵 𑐥𑐳𑐮𑐫𑑂 𑐥𑐳: 𑐰𑐣𑐾𑐐𑐸 𑐫𑐵𑐟 , 𑐕𑐩𑑂𑐴 𑐣𑐶𑐫𑐩𑐶𑐟 𑐐𑐵𑐴𑐵𑐎𑐷 𑐠𑐾𑑄 𑑋 𑐫𑐎𑑂𑐰 𑐮𑐶𑐥𑐵: , 𑐰 𑐩𑐶𑐳𑐵 𑐴𑑀𑐳𑐫𑑂 𑐰𑐮 𑐢𑐵𑐐𑐸 𑐣𑑂𑐫𑐾𑐣𑐵𑑄 𑐡𑐶𑐣𑐸 𑐮𑐫𑐟𑐵𑐮 𑑋 𑐀𑐣𑑄𑐮𑐶 𑐰 𑐩𑐶𑐳𑐵 𑐜𑐶𑐳𑑂𑐔𑐵𑐬𑑂𑐖 𑐖𑐸𑐐𑐸 𑐳𑐶𑐂𑐰𑑄 𑐐𑐸𑐮𑐶 𑐣𑑂𑐴𑑂𑐫𑑀 𑐣𑐶𑐳𑐾𑑄 𑐔𑐶𑐟𑐵𑐳𑐸 𑐩𑐡𑐫𑐎𑐵 𑐔𑑂𑐰𑑄𑐩𑑂𑐴 𑐡𑐶𑐣𑐸𑑄 𑐩𑑂𑐴 𑐴𑐾 𑐫𑐵𑐄𑑄𑐳𑑂𑐳𑐾 𑐔𑑂𑐰𑑄𑐐𑐸 𑐀𑐣𑐸𑐨𑐸𑐟𑐷 𑐫𑐵𑐟 𑑋

𑐣𑑂𑐫𑐵𑐡𑑃 𑐮𑐶𑐥𑐵 , 𑐕𑐣𑑂𑐴𑐸 !

𑐡𑐶𑐣𑐸𑐫𑐵 𑐀𑐧𑐸𑑄 𑐕𑐟𑐵: 𑐧𑐵𑑄𑐩𑐮𑐵𑐐𑐸 𑐳𑐸𑐔𑑄 𑐖𑑂𑐰𑐣𑐵 𑐰𑐮 𑑋

“ 𑐄𑐧𑑂𑐮𑐾 𑐎𑐳𑐶𑑄 𑐎𑐸𑐟𑐸𑑄 𑐰𑐩𑑂𑐴 𑐩𑐶𑐳𑐵 𑐩𑑂𑐴𑐶𑐐: 𑐣𑐶𑐩𑑀𑐣𑐶𑐫𑐵 𑐖𑐸𑐫𑐵 𑐩𑐣𑑂𑐟 𑐴𑑄 “

𑐡𑐶𑐣𑐸 𑐰𑐵𑐟𑐵𑐴𑑄 𑐖𑐸𑐮 𑑋 𑐀𑐮𑐾 𑐣𑑂𑐴𑐵𑐥𑐵𑐠𑐾𑑄 𑐡𑐶𑐣𑐸𑐫𑐵 𑐣𑐸𑐐: 𑐨𑐵𑐬𑐵𑐨𑐵𑐬𑐵 𑐩𑐩𑐷𑑄 𑑋 𑐩𑑂𑐴 𑐩𑐏𑐵: 𑑋 𑐩𑐶𑐏𑐵𑑄 𑐏𑑂𑐰𑐧𑐷 𑐣𑑄 𑐩𑐴𑐵: 𑑋

𑐟𑐬 𑐡𑐶𑐣𑐸 𑐀𑐖𑐸 𑐢𑐵𑐳𑐵 𑐀𑐧𑐳𑑂𑐫 𑐔𑐵𑐮 𑑋