नेवाः संस्कृतिया तिथि मिति विवाद ज्यंकेत अभियान शुरु

येँ । नेवाः समाजय् तिथि मिति विवादया कारणं संस्कृति हनेगुलिइ तसकं लिच्वः लानाच्वंगु दु । 

विशेष याना स्वन्ति नखः हनेगु सवालय् लक्ष्मी पुजा, म्हपुजा, किजा पुजा गुकुन्हु हनेगु धइगु विवादया कारणं अप्वः याना नेवाःतसें नेवाः संस्कृतिया ल्याखं तिथि विवाद याये मजिल धकाः सः तया वयाच्वंगु खः । स्वन्ति नखः जक मखु मोहनी नखः, गुँपुन्हि हनेगु सवालय् नं विवाद जुया वयाच्वंगु दु । आः प्यदँ लिपा ला झन छयमास वइ । अबले लक्ष्मी पुजा याये धुंकाः लच्छि लिपा जक म्हपुजा यायेमाःगु अवस्था ब्वलनी । थज्वःगु इलय् झन हे समस्या वइगु अवस्था दु धकाः ज्योतिष ज्ञान दुपिं व पात्रो सम्वन्धि चासो तइपिन्सं धायेगु याना वयाच्वंगु दु । सलक नेवाःतय्गु हे भावना कथं आः नेवाभः संस्कृति हनेगु सवलय् तिथि मिति विवादयात ज्यंकेगु नितिं आवंनिसें हे पहल शुरु यायेमाः धकाः नेवाः देय् दबू स्वनिगः विशेष प्रदेश समितिं तयेकूगु दु । उकिं तिथि विवादयात ज्यंकेत सहलह ब्याका वनेमाःगु खँय् ध्यान तया नेवाः देय् दबू स्वनिगः विशेष प्रदेश समितिपाखें विशेष पहल याःगु दु । 

थ्व हे झ्वलय् नेपाल ज्योतिष परिषद उपत्यका समितिया न्हूगु नेतृत्वयात खेँ सगं देछाया नेवाः संस्कृति हनेगु तिथि विवाद ज्यंकेगु अभियान शुरू जूगु दु । ने। सं। ११४५ कछलागा सप्तमी मंसिर ७ गते शुक्रवा थिमि लायकू लागाय् नेवाः देय् दबू स्वनिगः विशेष प्रदेशया संयनेजनय् नेवाः देय् दबू मध्यपुर थिमि नगर समितिया ग्वसालय् ज्योतिषया नेतृत्वपिन्त खेँ सगं लःल्हायेगु ज्या नाप नापं तिथि बिवाद ज्यंकेगु अभियान न्ह्यकूगु खः ।

उगु ज्याझ्वलय् नेवाः देय् दबू स्वनिगः विशेष प्रदेशया नायो श्रीकृष्यण महर्जन नेवाः नं तिथि मिति विवादयात ज्यंकेगु नितिं थनिनिसें हे पहलकदमि शुरु जूगु दु धयादिसें आः याकनं हे नेवाः ज्योतिषतय्गु सम्मेलन यायेमाःगु, येँया जनबहाः, यलया क्वाःबहाः व ख्वपया तजेजुया पुजारी नाप नापं स्वनिगःया थीथी लागाय् कर्मकाण्डया नितिं भूमिका म्हिता वयाच्वंपिं ज्योतिष, जोशी, बज्राचार्य, राजोपाध्याय, कर्माचार नापं सरोकारवालापिन्त छगू हे थासय् मुंकाः सहलह ब्याका वनेमाःगु खँय् बः बियादल । 

नेवाः देय् दबू येँ, यल व ख्वप जिल्ला समितिया प्रतिनिखधि नापं थीथी ब्यक्तित्वपिं उपस्थिाति जुयादीगु उगु ज्याझ्वलय् नेपाल ज्योतिष परिषद उपत्यका समितिया नायो ज्योतिष यज्ञरत्न बज्राचार्यं नेवाःतय्गु तिथिया विवादयात कया ज्यंकाः वनेगु नितिं सहलें छप्पँ जुया वनेमाःगु नापं थःगु नेतृत्वय् दुगु ज्योतिष परिषदं नं माःगु कथं भूमिका म्हितेगु जुइ धकाः बचं बियादीगु खः ।