येँ । नेवाः देय् दबू स्वनिगः विशेष प्रदेश समितिपाखें स्वनिगःन्यंकं स्थानीय पालिकाय् भाषा ऐन लागू याकेगु, विक्रम संवत नाप नापं नेपाल संवतयात नं न्हिया न्हिथंया ज्याय् छ्यले बिइकेगु व स्थानीय पाठ्यक्रम स्थानीय भाषा नेपालभाषां ब्वंकेगु व्यवस्था याके बिइगु नितिं विशेष अभियान न्ह्याकीगु जूगु दु ।
स्वनिगः दुनेया नेवाः देय् दबूया येँ, यल व ख्वप जिल्ला समिति नाप नापं स्वनिगः दुनेया फुक्क नगर समितिलिसे जाना अथे विशेष अभियान न्ह्याकेगु धकाः नकतिनि जक क्वचाःगु स्वनिगः विशेष प्रदेश समितिया पूर्ण वैठकं निर्णय याःगु खः । देय् दबू स्वनिगः विशेष प्रदेश समितिया नायः नविन थेच्वमिया नायःसुइ स्वनिगःया फुक्क जिल्ला व पालिका समितिया नायःपिनिगु उपस्थितिइ जूगु बैठकं अथे निर्णय याःगु खः ।
बैठकय् नेवाः देय् दबूया केन्द्रीय न्वकू रश्मीला प्रजापति, केन्द्रीय छब्याञ्जे मचाराजा महर्जन व स्वनिगः विशेष प्रदेशया निर्वतमान नायः श्रीकृष्ण महर्जनं आःया अवस्थाय् नेपाल संवत, भाषा ऐन व मातृभाषां शिक्षाया सवला छगू नाप मेगु स्वानाच्वंगु जुया नाप नापं अभियान न्ह्याकेमाःगु व उकिया नितिं स्वनिगः विशेष प्रदेशया नायः, जिल्ला समितिया नायः नापं सम्वन्धित पालिका समितिया नायःपिं दुथ्याका विशेष संयोजन याना वनेमाःगु खँय् बः बियादीगु खः ।
नेपाल सरकारं स्थानीय सरकार अर्थात पालिकातय्त नेपाल संवतयात नं छ्यलाबुला यायेत याःगु परिपत्र, भाषा आयोगं न्हापा हे भाषा ऐन दयेका ज्या यायेत सिफारिस याःगु पौ फुक्क पालिकाय् थौंसिबें दच्छि न्ह्यः हे सम्वन्धित पालिाकाय् थ्यंके धुंकूगु जुया बागमती प्रदेशया भाषा ऐन लागू यायेत बाय् पालिकापाखें थःगु हे ऐन दयेका लागू यायेत नापं स्थानीय पाठ्यक्रम स्थानीय भाषा नेपालभाषां ब्वंकेगु ज्या जुयाच्वंगु थासय् बांलाकेगु नापं उकिया नितिं देय् दबूपाखें अनुगमन यायेगु अले स्थानीय भाषां ब्वंकेगु ज्या मयानिगु थासय् ब्वंके बिइगु नितिं विशेष अभियान कथं लविङ यायेगु नापं दबाव मुलक कथंया गतिविधि यायेगु धकाः नं क्वःछिउगु खः ।
No comments:
Post a Comment