येँ । भदौ १३ गते शुक्रवाः बागमती प्रदेशया संस्कृति पर्यटन मन्त्री सुरेश श्रेष्ठं प्रदेशया भाषा ऐन कार्यान्वयनया नितिं ऐन कथ विज्ञ पुचः दयेकेगु व प्रतिष्ठान दयेकेगु नितिं माःगु कथं कुतः याये धकाः बचं बियादीगु दु ।
नेवाः देय् दबू स्वनिगः विशेष प्रदेश समिति, ख्वप जिल्ला समिति नापं नेवाः मिसा दबू ख्वप जिल्ला समितिपाखें शुक्रवाः वयकःया हे छेँ दुवाकोटय् वना सगं बिइगु झ्वलय् मन्त्री श्रेष्ठं अथे बचं बियादीगु खः ।
नेवाः देय् दबू स्वनिगः विशेष प्रदेश समितिया निर्वतमान नायः श्रीकृष्ण महर्जनं बागमती प्रदेश भाषा ऐन कार्यान्वयन जुल धकाः घोषणा जुसांनिसें थनि झिंप्यला न्ह्यःनिसें हे भाषा ऐनया दफा १३ सं व्यवस्था यानातःगु विज्ञ पुचः व दफा १५ सं व्यवस्था यानातःगु राष्ट्रभाषा विकास प्रतिष्ठान गठन मजुया हे भाषा ऐन कार्यान्वयनया चरणय् वना मच्वंगु खः धयादिसें ऐन कार्यान्वयनया नितिं ऐनया हे दफाया आधारय् संरचना निर्माण यायेवं कार्यान्वयनय् वनी धकाः धयादी धुंकाः मन्त्री श्रेष्ठं ऐनय् दुगु व्यवस्था कथं हे थः न्ह्याः वनेगु बचं बियादीगु खः । विज्ञ पुचः व प्रतिष्ठान गठनया नितिं सम्वन्धि पक्षलिसे थनिनिसें हे सहलह ब्याका थः वनेगु जुइ धकाः तकं बागमती प्रदेश संस्कृति तथा पर्यटन मन्त्री सुरेश श्रेष्ठं धयादीगु खः ।
मन्त्री श्रेष्ठयात भिंतुना पौ नं लःल्हाःगु उगु ज्याझ्वलय् नेवाः देय् दबू स्वनिगः विशेष प्रदेश समितिया मूछ्याञ्जे हरिबहादुर श्रेष्ठ, सचिवालय दुजः कृष्ण प्रजापति, ख्वप जिल्लाया नायः नरेश नेवाः, ख्वप नगरया नायः कृष्ण प्रसाद प्रजापति, न्वकू रामचन्द्र प्रजापती, छ्याञ्जे विश्वराम लागे, नेवाः मिसा दबू जिल्ला नायः सरिता दुवाल, मिसा दबू जिल्ला नगर समितिया नायः सुनिता कर्माचार्य, अन्जना सिजःख्व, सरिता ज्ञांमदु, सिवराम दुवाल नं झायादीगु खः ।
No comments:
Post a Comment