निक्वःगु नेपाल गितार महोत्सवय् 'द हिमालयन हेन्ड्रिक्सं धिमेबाजाया तालयात गितार, ड्रमय् हिइकल

यल । गितारवादक विजय कपाली  (म्याक्सिमस) व हरि कुँवर (एयर स्पेस ब्याण्डया) मंकाः ग्वसालय् जूगु निक्वःगु नेपाल गितार महोत्सव  झं झं धायेक क्वचाल । 

उगु महोत्सवय् हलिन्यंक नां जाःम्ह अशेष डंगोलं 'द हिमालयन हेन्ड्रिक्सं सानेपाया क्याम्पा द सोशल हबय् छगू सांगितिक प्रस्तुति बियादीगु खः ।

बहनी १ निसें ८ बजे तक जूगु उगु संगीत महोत्सवय् ‘द हिमालयन हेन्ड्रिक्स’या म्येत अशेष डंगोलया डार्क क्लाउड्स अल ओभर द स्काई, इन्सर्च टुवर्ड्स फ्रीडम, फंक वाइब, व धिमे बाजाया तालय् दयेकूगु काठमाडौं भाइबया म्ये न्ह्यब्वःगु खः । वय्कःयात गितार थानाः द इलेक्ट्रिक ब्याण्डया दिपक शाक्य व रोबिन व न्यू रिभोलुसन ब्याण्डया ड्रमर विजय बराल नं साथ बियादीगु खः ।

नेवाः कलाकारपिनिगु सांगीतिक स्तर थकायेगु नितिं वंगु दँनिसें न्ह्याःगु नेपाल गितार महोत्सवय् पृथ्वी कुँवर, रिदिस महर्जन, संजोग लामा, आशीष कायस्थ, आदित राई, नयन जोशी, बरुण खरेल, रिग्जिन लामा, विनायक शाह, आयुष खतिवडा, रक्केर, मन्नु शाही (जेरे), देव लामा, विजय कपाली (म्याक्सिमस), विनय शाह, व सन्नी तुलाधर (सनी एसटी) नं सांगितिक प्रस्तुति बियादिल ।

ज्याझ्वः ताःलाकेत सुबोध भण्डारी (क्याम्प द सोशल हब), दीपक शाक्य (क्याम्प २२ स्टुडियो), किरण शाही, अपुर्वा नेपाली रायमाझी (सहना गितार मेड इन नेपाल), व जोलन श्रेष्ठ (स्प्रिंग बज्) पिन्सं ग्वाहालि यानादीगु खः ।

ज्याझ्वलय् देव राणा, ज्योति घिमिरे, दिनेश राई, नेपाःया पौराणिक प्रिज्म ब्याण्डया पेम्बा लेप्चा, अन्तर्राष्ट्रिय स्तरय् नांजाःम्ह गितारवादक अशेष डंगोल ‘द हिमालयन हेन्ड्रिक्स’यात नं सम्मान याःगु खः ।

अन्तिम जाम सेसनय् ज्योति घिमिरे, सतीश स्थापित, गिरिश श्रेष्ठ, हरि कुँवर, सुजन मानन्धर व देव लामाया ब्वति दुगु खः । थ्व बाहेक यैर स्पेसया संजित तुलाधर, ड्रमय् एस.एस. ज्याझ्वलय् ब्वति काःपिं कलाकारपिन्त ग्वसाःखलकं मतिना व मतिना पौ लःल्हाःगु खः ।

ज्याझ्वःया ग्वसाः खलः विजय कपालीं (म्याक्सिमस) थुगु गितार महोत्सव नेवाः संगीत, गितार संस्कृति व संगीतप्रेमीपिन्त छगू हे थासय् मुंकाः नेपाःया संगीतया सम्भावना, प्रतिभा व समृद्ध भविष्ययात अझ उजागर यायेगु कुतः जूगु अभियान जूगु जानकारी बियादीगु खः । वय्कलं वइगु दिनय् नेपाली गितार संगीतयात राष्ट्रिय व अन्तर्राष्ट्रिय ख्यलय् अझ व्यापक यायेगु लक्ष्य दुगु जानकारी बियादिल ।

क्वलय् लिंकय् किलिक यानाः स्वयादिइफै

https://www.youtube.com/watch?v=99rf8p7vFm0