बुङ्गद्यो व किपुया स्वापु

शुद्वरत्न महर्जन, कीपू १

थौं सिवें १६८९ दँ न्हयो बुङ्गद्यो नेपालय् बिज्याकु बलय् ख्वप या जुजु नरेन्द्रदेव, येँ या बन्धुदत्त, यलया ललित ज्यापू व किपुया कर्कोटक नागराज प्यम्ह जानां हल।

द्यो यात रथय् तया दँय् दँसं बुङगं निसें यल देय् चाहिका हाकनं बुङ्गय् जाह्वला याः न्यायेकिगु चलन त्वाथला यलया जुजु श्री निवास मल्लं १२दँय् छक जक यायेगु चलन दयेकल।

थौं तक्कं नं १२दँय् छकः यलया जाह्वलायाः न्यायेके धुंका द्यो किपुलिइ साले धकाः चान्हेय् ९ठाडो ढुंगा०तःस्वा ल्वहं तक रथ सालाः अनं लितयंकिगु चलन दु।उगु ल्वहं द्यो रथ सले मजिइक पनेत तःगु धाइ।

यलय् लवंयाः न्याके धुंका रथय् नैक्यालं लुइधुंका कन्हे सुथय् याकः मिसा याः न्यायेकिइगु चलन दु।गुकिइ रथ यात छत्वाचा मिसापिं जक जानां सालिइ। द्यो रथ यलया इति त्वालय् निकालँय् थयंकिइ।

थनं लिपा मंगलय् फल्चाय् ज्योतिषिं भिं साइत पिकया उगु साइत या ४न्हु न्हयः किपुया प्यंङथाँ चुकय् जल पानेजु वयाः स्वाँ तः वइगु ख।उगु स्वाँ किपुया प्यंङथाँ चुकय् छगु परिवार पाखें निइ जुम्हं म्हयाये मचां लःल्हानां काइ।

थ्व परम्परा थौं तक्कं मदिक्क न्हायानां च्वन।यलया इति त्वालं द्यो रथ सालेत ४न्हु लिपा सकलें किपुमि जानां वनि।किपुपा धिमे नं ज्वना वनिइ।रथ सालाः जाह्वलाख्यलय् गालं थत हलकि द्यो रथ किपुलिइ हयेदु धयातल।थथे रथ सालेत गुठी संस्थान ललितपुर पाखें किपु नगरपालिका यात पत्र तकं बिइ।

४न्हु लिपा जाह्वलायाः कुन्हु सकल किपु लगायत आपालं याः स्ववनिइ।किपुया गुँदे लागाया दापा खलः पाखें इताछेँ या चिबहाः द्यो न्हयोने बुङ्गद्यो स्वया दापा थायेगु चलन थौं तक्कं मदिक्क न्हायानां च्वंगु दु।

थथे किपुलिसे आपालं पुलांगु सम्बन्ध दुगु बुङ्गद्यो या जात्रा नापं स्वापू दुगु चलन कथं किपुलिइ प्यंङथाँ चुकय् स्वाँ तःवइगु चलन थौं वया विवाद उत्पन्न जुया किपुलिइ स्वाँ तःवइगु चलन त्वादैगु सम्भावना ब्वलनावगुलिं सकलें किपुमि चिन्तित जुयाच्वन।

सकसिनं स्युगु हे खँ कि गःछेँ सुखी समाज या कुतलय् किपुलिइ प्यंङथाँ चुकय् सम्बन्धित आपलं लिसेया सहलह लिपा याकनं हे याकः मिसा व करुणामय बुङ्गद्यो या मुर्ति दयेकल। याकनं हे दयेकुगु उगु मुर्ति आपालं लावालस्कर सहित किपुलिइ हल।२(४न्हु लिपाहे उगु मुर्ति विवाद या कच्वं पिहांवल। बुङद्यो करुणामय लिसे मुख्य सम्बन्धित खलः ३२पानेजुु खलः पाखें द्यो तःगु खँय् आपत्ति प्वंकल। थौं तक्कं उगु विवाद या खँय् आपालं सरोकार निकाय पाखें द्यो उगु थासं लिकायेत पत्राचार यायेधुःकुगु दु।अथेसां गःछेँ सुखी समाज पाखें बिज्ञप्ति पिकायेगु बाहेक मेगु विकल्प या खँ ल्हागु तायेमदु।

छुं दिन न्हयो किपु नगरपालिका या आवहान कथं किपुया दापा खलः व मेमेपिं सम्बन्धित खलः नापं च्वंगु बैठक या क्वछिना कथं करुणामय व याकःमिसाया मुर्ति किपु नगरपालिका या मेयर या जिम्माय् लःल्हानां आ यातः बुङ्गद्यो या रथ जात्रा क्वचाये धुंकालि उगु मुर्ति या बारे आपालं सहलह ब्याका सकसिगु सहमति दयेका न्हाया वनेगु क्वछिना जुल।

थुगु क्वछिना यात लाकमं प्यंकेथें यानां उगु मिटिङ्ग या निर्णय यानांवंगु गःछेँ दाफा खलः पाखें तुरुन्त हे थगुहे निर्णय अमान्य धकाः बिज्ञप्ति पिकाल।

थौं करुणामय बुङ्गद्यो या रथ यात्रा न्ह्याका गाःबहायाः नयाकेकिगु इलय् थ्यन।३२ पानेजु संघ पाखें जल पानेजु यात किपुलिइ प्यंङथाँ चुकय् स्वाँ तःवनेगु मयायेत पत्राचार याये धुंका छुँ घण्टा लिपाहे गःछेँ सुखी समाज पाखें बिज्ञप्ति पिकाल गुकिइ परम्परा न्हायकेत बार्ता यानां गुलि कुहांवयेफु उलि कुहांवया खँ ल्हायेत थपिं तयार दुगु न्हयथनातल।

थ्व मचा म्हिते थें पहलं समस्या ज्यनिमखु।खँ आपालं स्यने धुंकल उकिं याकन लिमबाकुसें परम्परा निर्वाधरुपमा न्हाकेत व मुर्ति स्थापना या बारे मागु सहलह यायेत किपु नगरपालिका यात मध्यस्थता याकेत न्हापा या निर्णय कथं न्हयोने वनेगु बाहेक मेगु विकल्प जिंला मखं।