येँ । स्थानीय विषय अन्तर्गत येँ महानगरपालिकाया सामुदायिक ब्वनेकुथी नेपालभाषा विषय ब्वंकाच्वंपिं नेपालभाषा प्रशिक्षण सहायकपिनिगु मंकाः दबू ‘नेपालभाषा स्यनामि दबू’ नीस्वंगु दु ।
नेवाः देय् दबूअन्तर्गत नेपालभाषा स्यनामिपिनिगु कवःकथं रितेश मल्लया नायाेसुइ थुगु दबू नीस्वंगु खः ।
येँया भानु मा.वि.इ थौं ने.सं. ११४५ पोहेलागा पंचमी, आइतवाः नेवाः देय् दबूया केन्द्रीय नायः पवित्र वज्राचार्यया मू पाहांसुइ दबू नीस्वना ज्याझ्वः क्वचाःगु खः ।
नवगठित दबुली न्वकू सविना महर्जन, मू छ्याञ्जे राकेश महर्जन, छ्याञ्जे सुष्मा डंगोल, मू दांभरि मिला शाक्य, दांभरि अनिल महर्जनपिं च्वनादीगु खः ।
अथे हे दबूया दुजलय् राम महर्जन, राजेन्द्र महर्जन, रजनी महर्जन, साजना महर्जन, लसता सिं, उर्मिला महर्जन, अनिता शाक्य, ओमकृष्ण श्रेष्ठ, राजु कपाली, सरिता मालाकार, राजेन्द्रलाल महर्जन व राधेश्याम महर्जनपिं च्वनादीगु दु ।
न्हूगु कार्यसमितिया पदाधिकारीपिन्त नेवाः देय् दबुलिं छगू ज्याझ्वःया दथुइ लसकुस यासें शपथ ग्रहण याकीगु जूगु दु । आःया लागि थुगु दबुली येँ मनपा अन्तर्गतया नेपालभाषा स्यनामिपिं दुथ्याःगु दुसा थुकी यल मनपा, किपू व तोखा नगरपालिकाया सामुदायिक ब्वनेकुथी ब्वंकाच्वंपिं नेपालभाषा स्यनामिपिंत नं दुथ्याकाः नेपालभाषा स्यनामिपिनिगु मंकाः दबू दयेकेगु ग्वसाः दुगु जानकारी स्यनामि दबूया नायः रितेश मल्लं बियादिल ।
मूपाहांया थासं न्ववानादिसें नेवाः देय् दबूया नायः पवित्र वज्राचार्यं नेवाः देय् दबू नेवाःतय्गु राष्ट्रिय संगठन जूगुलिं थुकी आपालं पेशागत कवः दुथाय् आः नेपालभाषा स्यनामिपिनिगु नं कवः दुथ्याकेखंगु लसताया खँ जूगु दु धयादिल । दबू नीस्वना ज्याझ्वलय् नेवाः देय् दबूया मू छ्याञ्जे सत्यनारायण डंगोल, स्वनिगः विशेष प्रदेशया नायः श्रीकृष्ण महर्जन, येँ जिल्ला समितिया नायः धनबहादुर महर्जन, येँ जिल्ला समितिया न्वकू श्रीजनमान श्रेष्ठ लिसें नेवाः स्यनामि दबूया छ्याञ्जे वरुणप्रसाद वैद्यपिनि उपस्थिति दुगु खः ।
No comments:
Post a Comment