प्रिय् जितः छं तःमि जु धैला ?

                                                                                                                                    कविकेशरी चित्तधर 'हृदय'

मयो थ्व जगतय् तःमि जि ज्वीगु 
क्वत्यलाः ज्वी नं ह्मा मेपिन्त,
‘मदु' धैगु छता कुबुयां गा: थाय्
धन्दा न्याफा कुबुया ज्वीला ?
प्रिये, जितः छं त:मि जु धैला ?

छगू रोग खः तःमि ज्वीगु नं
अय्लाःगुलु थें त:मिपहः झं,
रोगी अयलाःगुलु थें ज्वीका:
गुलि दत उलि झं थ:त मछिंकाः
प्रिये, जितः छं तःमि जु धैला ?

दत धाय्वं तुं गोछाः नय् ज्यू ?
दय्वं बः बः गोजु पुने ज्यू ?
केवल मेपिनिगु मिखाय् हाकाः
‘तःमि व त:मि व´धाय्का ज्वीला ?
प्रिये, जित: छं तःमि जु धैला ?

खः का मेपिनि न्ह्योने छ क्वह्यं 
अमि ‘भुनुभुनु' नं न्यन्यमा: ज्वी छं
अज्ज ज्वेप्युप्युं स्वः ज्वी छन्त
उकि छ नं अमि जो ज्वी यल ला ?
प्रिये, जितः छं तःमि जु धैला ?

खः जा जितः नं खर्च लिमलाः
छमो-निमो दामं हे खत्ता,
अय्नं उगु सुख दुख सहयाय्गु
मानव जीवन धैगु व हे ला ?
प्रिये, जितः छं तःमि जु धैला !

त: मि   त:मपिं ,  ब:ब:ला:पिं
वं लिस्य नां नं नापं वन रे
निन्हुया त्येँ फुइँ याना: जगते
जिगु नं अय् हे छं छ्वय् धैला ?
प्रिये, छं जित:  त: मि जू  धैला ?

ह्नापा ह्नापायापिं कविपिं 
कलाकार वा गायकपिं 
सु जक जुया वन धा रे तःमि ?
जि जक अमिगु अःखः ज्वी जीला ?
प्रिये, जित: छं त:मि' जु धैला ?

भारवि ससले सा ज: जुल रे
कालिदासया मेपिनि भर रे
मधुसूदन सित चीमि जुया: हे
सिद्धिदास धनि गबलें जुल ला ?
प्रिये जित: छं त:मि जु धैला ?

थुकथं जिमि कुल तं तं चीमि
जि जक गनं ज्वी धा रे तःमि
“बुद्ध वंशया नियम थ्व हे ख:”
धा:गु बुद्ध- वाचा लोमन ला ?
प्रिये, जित: छं त:मि जु धैला?

                  - नेपाल ऋतुपौ; दँ ४: ल्या: ६: ने. सं. १०७६ 

भाषा ऐन कथं विज्ञ पुचःया नितिं पहल यायेगु प्रदेश मन्त्री महर्जनया बच ऐन कार्यान्वयन मयात धाःसा सतकय् वनेगु ख्याच्वः

 येँ । बागमती प्रदेशया श्रम, रोजगार तथा यातायात मन्त्री कृष्णभक्त महर्जनं प्रदेशया भाषा ऐन कार्यान्वयनया नितिं ऐनय् दुगु कथं विज्ञ पुचः व प्रतिष्ठान गठनया नितिं विभागीय मन्त्रीलिसे खँ ल्हायेगु नापं मन्त्री परिषद्या बैठकय् खँ तयेगु बचं बियादीगु दु ।

 नेवाः देय् दबू यल जिल्लाया शनिवाः माग १९ गते जूगु निक्वःगु अधिवेशनया झ्वलय् मूपाहां मन्त्री महर्जनं अथे बचं बियादीगु खः ।

अधिवेशनया झ्वलय् विशेष पाहां नेवाः देय् दबू स्वनिगः विशेष प्रदेश समितिया नायो श्रीकृष्ण महर्जनं नेपालभाषायात कामकाजि भाषा कथं लागू यायेगु नितिं दयेकूगु ऐनय् व्यवस्था दुगु विज्ञ पुचः व प्रतिष्ठान गठन यायेगु ज्या मयात धाःसा दबावमुलक ज्याझ्वः ज्वना सतकय् वयेत बाध्य जुइ धकाः धयादीगु खः । 

 नेवाः देय् दबू यल जिल्ला समितिया नायो रविन्द्र शाक्यया नायोसुइ जूगु उद्घाटन समारोह क्वचाये धुंकाः बन्द शत्र जूगु खः । बन्दशत्रपाखें यल जिल्लाया नितिं न्हूगु नेतृत्व सर्वसम्मत कथं ल्ययेगु ज्या नं जुल । यल जिल्लाया न्हूगु नेतृत्व कथं नायो कृष्णभक्त डंगोल, बरिष्ठ न्वकू विजय कुमार महर्जन, न्वकू गजेन्द्र प्रधान, मिसा न्वकू सबिता डंगोल, छ्याञ्जे बुद्धलक्ष्मी महर्जन, मिसा छ्याञ्जे ज्ञानी महर्जन, दांभरी अमिरराज महर्जन, दुजलय् निशान महर्जन, तुल्सी बहादुर महर्जन, मनोज महर्जन, रविन शाक्य, पशुपतिभक्त तुृलाधर, दशराज तण्डुकार, साजन महर्जन, निलम डंगोल, अमिता अवाले, रश्मी महर्जन, गजेन्द्र महर्जन, एलेन महर्जन, जयराम महर्जन व भूवन श्रेष्ठ सर्वसम्मतं ल्ययेगु ज्या जूगु खः ।