पाहाँचह्रेया खुन्हु जूगु हिंसात्मक घतनायात कया नेवाःतय्गु मंकाः विज्ञप्ति

 येँ । नेपाःया स्वनिगःया थीथी जिल्लाय् च्वंपिं नापं देशं पिने नं थीथी देशय् च्वनाच्वंपिं नेवाःतसें पाहांचःह्ेया दिं वंगु चैत्र १५ गते येँया तिनकुने जूगु घटनायात कया मंकाः विज्ञप्ति जारी याःगु दु ।

 न्याम्ह नेवाःया पहलय् जूगु थुगु मंकाः विज्ञप्ति नीस्वम्हेस्यां जारी याःगु खः । नेपालभाषा, अंग्रेजि व नेपाली भाषां याना स्वंगू हे भाषां पिथंगु विज्ञप्तिइ घतनाया दक्वं पक्षय् पारदर्सि अनुसन्धान याना घतना यायेत जिम्मेवार तथा घतना जुइत उस्केय् याःपिं समेत दक्वसित माःमाःकथं दन्द सँजाय बिइत व सकलें पिदितपिन्त माःमाःकथं क्षतिपुर्तिया व्यवस्था यायेत माग याःगु दु । विज्ञप्तिइ थुगु कथं न्ह्यथनातःगु दुः ‘ने.सं. ११४५ चिल्लागा पाहाँचह्रे सुक्रवार कुन्हु आदिवासी नेवाःतय्गु आदिभूमि नेपाःगाः अर्थात स्वनिगलय् जूगु दंगा, हिंसा व अराजक गतिविधिया झ्वलय्  निम्ह होनहार नेवाः ल्यायम्हपिं सबिन महर्जन व सुरेश रजकयात स्याना ब्यूगु प्रति जिमिगु गम्भीर दुख प्वंकुसें व घतनाया सन्दर्भय् पारदर्सि छानबिन यायेत अले, दोसिपिन्त हद तकया कारवाहि यायेत नापं पीडितयात न्याय बिइत जिमिगु इनाप दु। सबिन महर्जन द्राइबर ज्या यातायात व्यवसाय याना सामान्य मध्यमस्तरीय जीवन हनाच्वंम्ह कर्मसील ल्यायम्ह खः। निशस्त्र युवायात म्वास्सां म्वास्सां गोलिं कयेकेगु आदेस ब्यूम्ह अले निहत्था मनूयात विवेक मतसें गोलिं कयेकिइम्ह मनूत म्हसिइका इमित कानूनी कारवाहि यायेमाः।

सुरेश रजक पत्रकारीता पेशाया झ्वलय् सकलसिनत घटनाया बारे जानकारी बिइगु बुखँ मुंकेगु ज्या यानाच्वंबलय् अराजक जत्थां हमला याना मि च्यानाच्वंगु कोथाय् कुनाबिइवं वय्‌कः म्वाःम्वाकं हे मिं छ्वया सीमाल। थुगु घटनाया सत्यतथ्य मालास् थजाःगु अमानवीय नियोजित हत्याया दोषि म्हसिइका हद तक्कया सँजाय व कारवाहि जुइ हे माः। व बाहेक नेवाः कानून व्यवसायी राज सुवाल व प्रेम श्रेष्ठया ज्याकू छ्वयेका बिया वंगु २५–३० दँ निसें या मूवंगु भ्वँ दस्तावेज अभिलेख त नास यानाब्यूगु दु। अथे हे मेमेथासय् नं तोडफोड, मि तयेगु, लुतेय् यायेगु थें जाःगु भौतिक क्षति नं यक्व हे थासय् याना ब्यूगु दु। राजनीतिक परिवर्तनया नां बिया जुइगु थजाःगु हिंसात्मक व अराजक गतिविधिया सिकार निर्दोष नेवाः समुदाय पाखें गुलि जक भोगे यायेगु रु नेवाः समुदाययात बलि बिया सत्ता व भत्ताया राजनीति यायेगु हरकत स्वीकार्य जु हे मजू। स्यंगु भौतिक साधन ला क्षतिपुर्ति याना न्हू दयेके फै, तर म्वायेक म्वायेकं हमला याना स्याना ब्यूगु जीवन व हत्या श्रृंखलाया क्षतिपुर्ति सम्भव दु ला ? थ्व घतनाया दक्वं पक्षय् पारदर्सि अनुसन्धान याना घतना यायेत जिम्मेवार तथा घतना जुइत उस्केय् याःपिं समेत दक्वसित माःमाःकथं दन्द सँजाय बिइत व सकलें पिदितपिन्त माःमाःकथं क्षतिपुर्तिया व्यवस्था यायेत जिमिगु जोरदार माग न्ह्यब्वइच्वना।’

मंकाः विज्ञप्तिइ ल्हाःचिं तयादीपिं थुगु कथं दुः १) डा. शान्तवीर सिंह तुलाधर, २) त्रिभुवन तुलाधर, ३) लाभरत्न तुलाधर, ४) डा. विजय सैंजु, ५) डा. लक्ष्मी भक्त शिल्पकार, ६) भिक्षु आनन्द, ७) श्रीकृष्ण महर्जन नेवाः, ८) डा. रोशन श्रेष्ठ, ९) शान्त प्रकाश श्रेष्ठ, १०) कमल प्रसाद श्रेष्ठ, ११) कस्तुरी श्रेष्ठ,  १२) योगेन्द्र श्रेष्ठ, १३) द्रबिन कर्माचार्य, १४) राम शरण मानन्धर, १५) अमिर महर्जन, १६) देवराज महर्जन, १७) डा. प्रसन्नलाल अमात्य, १८) जीवन पति श्रेष्ठ, १९) सुमन श्रेष्ठ, २०) गंगा बहादुर नेम्कुल, २१) अरुण रंजितकार, २२) सुदय शिलाकार, २३) नरेश नेवाः