समर्पण
माँ
कविकेशरी चित्तधर हृदय (पद्वम निकुञ्ज )
(इन्द्र बज्रा छन्द)
(१)
योमाँ ! मह्नां छिति दुःखहारी ।
संसार सं मेव महोपकारी ॥
न्हापां तया छि तल गर्भ पद्मे ।
बिन्ती गुली यां ? नर यागु जन्मे ||
(२)
दुःखोपभोगी पर यागु निम्ति ।
दैला सुयाकें थुलि आत्म शक्ति ?
हा ! जन्मनीत गुगु दुःख पीडा ।
छि भोग यागू मखुसो व क्रीडा ॥
(३)
प्रसूतिका पुत्र वतीत तोता
मस्यू सुनानं उगु दुःख माता !
ब्वीवं मचाया नव-प्राण तें त
तुरन्त मातां बिइ दुग्ध नें त ॥
( ४ )
प्रत्येक मातां थव पुत्र पिन्त
याना तई स्नेह अहा अनन्त ।
चान्ही मधा से गुलिखे बिचार
याना ब्वल का तल बार बार ॥
(५)
मुत्रादि नाना मल यात शुद्ध
याना मधाछि गबलें अशुद्ध ।
ह्वीका सिका नित्य दया अखण्ड माता !
तया न्वा इगु मन्द मन्द ॥
( ६ )
आनं लुमनी उगु नित्य तंगू
न्हिन्हि म्हितानं जननी ! मगागू |
माता छिगु अङ्क महा अमूल्य
आनन्द बीगू थन स्वर्ग तूल्य ।।
(७)
लोके मदून्हाँ गुरु छी समान ।
विद्वान्पि सं धैतल नं महान ||
गुरू सिवे नं गुरू घाय योग्य ।
कारण मचाते जुलमां निरोग्य ॥
(८)
छियाक्व सेवा जिमि व्याक्क जीवें
फैला पलेसा पुल्येगू छु व्याक्क सर्व ॥
तथापि फक्को रतिमात्र जसां ।
सेवा नरं यायगु मातृ भाषा ।।
(९)
हा ! माँ ! छिगू प्रेम सुपूर्ण वाणी ।
आनन्द दायी गुण यागु खानी ॥
परम् सुयाके सदु भाग्य बंगू ।
थ्व छंग प्रीती गन वेत देगू ?
(१०)
स्वमाम यागू उगु स्नेह वाक्य |
ज्या च्वनीगू नर जाति ऐक्य ||
पूज्याति पूज्या गुण माम यागू ।
लो मंक्य ज्यूगू मखु मागु मागु ॥
(११)
सद्धि आदी गुण यात बीया ।
तःगु विधातां नर पद्वि सीया ।।
स्वमाम या स्नेह सुपूर्ण प्रीति ।
लोमंह्म ज्वीगू नर पद्वि च्यूति ॥
(१२)
माता धयागू थुगु शब्द जवक |
संयोग ज्वीव उगु शब्द फुक्क ।।
माता समःज्वी सुख बीह्य खासा |
स्व "जन्म भूमी" थव "मातृ भाषा" ।।
(१३)
तस्मात योमाँ ! थुगु ब्याक्क छंगू
दें का जिनं "पद्य निकुञ्ज" न्हूगु
अत्यन्त श्रद्धामय भक्ति याना
थाैँ छन्त हे अर्पण याय ना.नाः
मातृविहीन बालक हृदय ।
