नेवाः वस्ती सक्व सांस्कृतिक संरक्षित क्षेत्र प्रस्तावित ऐन लःल्हात

नेवाःतय्गु तसकं पुलांगु वस्ती सक्वयात सांस्कृतिक संरक्षित क्षेत्र घोषणा यायेगु नितिं माःगु कथंया प्रतिवेदन नापं प्रस्तावित ऐन शंखरापुर नगरपालिकाया मेयर रमेश नापितयात लःल्हाःगु दु । नगरपालिकां दयेकूगु कार्यदलया कजि गोविन्द प्रसाद श्रेष्ठपाखें मेयर नापितयात शनिवाः उगु प्रतिवेदन व प्रस्तावित ऐन लःल्हानादीगु खः । 

कजि श्रेष्ठ म्ह मफुगुलिं वय्कःया हे छेँय् छगू ज्याझ्वःयासें मेयर रमेश नापितयात अले लःल्हायेगु ज्या याःगु खः ।   शखरापुर नरपालिकां नीस्वंगु कार्यदलय् दुपिं फुक्क कजि व दुजःपिं नापं सक्ववासी हे खःसा सदस्य सचिव कर्मचार व सल्लाहकार श्रीकृष्ण महर्जन किपूयाम्ह खः ।  

थुगु कार्यदलय् थुगु कथं दुः कजि गोविन्द प्रसाद श्रेष्ठ, ल्यू कजि प्रकाशमान श्रेष्ठ, दुजः तिलकमानन्द बज्राचार्य, द्धचारिकानाथ श्रेष्ठ, जनक नारायण श्रेष्ठ, प्रविणमान सिं, प्रतिभाव श्रेष्ठ, कृष्णदेवी कारंजित, तुलाराम लामा, चन्द्र नारायण श्रेष्ठ, जीवनलाल श्रेष्ठ, कानुनी सल्लाहकार शिवप्रसाद श्रेष्ठ, सल्लाहकार श्रीकृष्ण महर्जन, सदस्य सचिव रवि शर्मा, अथेहे सक्वया निम्ह वडा अध्यक्षपिं नगर समन्वयया नितिं च्वनादीगु खः । 

 वय्कःपिं राधाकृष्ण श्रेष्ठ व विष्णु प्रसाद श्रेष्ठ खः ।  उगु कार्यदलं सक्वया मुर्त अमुर्त सांस्कृतिक, प्रथाजनीत संस्था गुथि, दाफा खलः, अनया नेवाः दुनेया थरतय्गु बारे ब्यापक अध्ययण याना प्रतिवेदन तयार याःगु खः ।  उगु हे प्रतिवेदनया आधारय् सक्व सांस्कृतिक संरक्षित क्षेत्र सम्वन्धि प्रस्तावित ऐन तयार तयार याना लःल्हाःगु दु ।  उगु ऐनय् ब्यवस्था जूगु कथं अनया गुलि नं नेवाः दुनेया थरत दु इपिगु गुथिनिसें त्वाःपाखें प्रतिनिधित्व जुइगु कथं समानुपातिक समवोशी प्रतिनिधित्व याका निर्माण जुइगु समिति बैधानी समिति जुइगु खँ उल्लेख यानातःगु दु ।  सक्वया नितिं तयार जूगु उगु प्रतिवेदन व ऐनयात आः वइगु असारं जुइगु नगरसभाय् यंकाः पारित याना कर्यान्वन यायेगु जुइ धकाः मेयर नापितं धयादिल ।  

अले प्रतिवेदनयात शंखरापुर नगरपालिकाया दस्तावेजया रुपय् नाला कायेगु जुइ धयादिल ।  अथे शंखरापुर नगरपालिकाया प्रवक्ता नापं वडा अध्यक्ष राधाकृष्ण श्रेष्ठं ऐतिहासिक सक्वया थाय् बाय्या प्राचिन नां तयेगु ज्या यानागु, नेवाः भासं व तामाङ भासं आखः ब्वंकेगु नितिं पाठ्य पुस्तक तयार जुयाच्वंगु दु धयादिसें आः सक्वयात सांस्कृतिक संरक्षित क्षेत्र कथं न्ह्यःने यंके धुंकाः तामाङतय्गु नं सांस्कृतिक संरक्षित क्षेत्र दयेका वनेगु जुइ धयादिल ।