सक्वय् महाकवि गिरिजाप्रसाद जोशीया पुर्न कद झ्वाता पलिस्था व हुलाक टिकट पिथनेमाः कजि रिदेन महर्जन
काठमाडौं। रत्न राज्य लक्ष्मी क्याम्पसया सुकुन्दा साहित्य पालापाखें महाकवि गिरिजाप्रसाद जोशीया ८६ क्वःगु जन्मजयन्ती हंगु दु ।
थौंसिबे निदँ न्ह्यनिसें मदिक्क हनेगु झ्वलय् वंगु बिहिबाः महाकविया बुँदि हनेगु झ्वलय् चैत्र १५ गते तीन कुने आन्दोलनय् ज्यान गुमेयानादीपिं स्थानीय नेवाः समुदाय निम्ह सपुतपिं सबिन महर्जन व पत्रकार सुरेश रजकया आकाझाकां मदुगुलिई सुखावति भुवनय् बासः लायेमा धकाःकामना यासें छगू मिनेट मौन धारण याःगु खः ।
ज्याझ्वःया विशेष पाहां वल्र्ड नेवा अर्गनाइजेशनया संस्थापक नायः, साहित्यकार नापं मातृभाषा सेवी डा. बालगोपाल श्रेष्ठं महाकवि गिरिजाप्रसाद जोशी छम्ह महान साहित्यकार जूगु खँ न्ह्यथनादिसें वय्कःया नेतृत्वय् सक्वय् थीथी साहित्यिक व सांस्कृतिक ज्याझ्वःया ग्वसाः ग्वःगु खँ लुमंकादिसें वय्कलं थीथी साहित्यिक व सांस्कृतिक ज्याझ्वः याइगु व महाकवि गिरिजा जोशीं रचना व वय्कलं दयेकादीगु जनता म्ये हाला चेतना थनेगु ज्यानादिगु लुमंकाःदिल ।
महाकाव्य निसेंकया आपालं कृति त्वःतादीम्ह महाकवि गिरिजाप्रसाद जोशीं ४९ दँया चीहाकःगु उमेरय् हे थ्व संसार त्वःताः वन धाःसां वय्कलं ७० स्वयां अप्वः साहित्यया कृति सिर्जना यानाः नेपालभाषा साहित्यया धुकू जायेकाः अमूल्य योगदान बियादीगु खँ कनादिल। वय्कः संसार त्वःता वने धुंकूसानं थः लगायत नेपालभाषा ख्यया आपालं साहित्यकारपिनिगु नितिं प्रेरणाया स्रोत जूगु धयादिल ।
अथेहे विशेष पाहा रत्न राज्य लक्ष्मी क्याम्पसया नेपालभाषा स्यनामि योगेन्द्र राजकर्णिकारं महाकवि गिरिजा जोशीया साहित्य प्रगतीवादी, जीवनवादी दृष्टिकोण उत्पिडित वर्गयात शोषणया विरोधय् संघर्षया नितिं उत्प्रेरणा जूगु धकाः चर्चा यानाः दिल । अथेहे व उगु क्याम्पसयाहे मेम्ह विशेष पाहा स्यनामि श्रमिला सुवालं महाकवि गिरिजा जोशीया व्यक्तित्वयात कयाः चर्चा यानादीगु खः ।
रत्न राज्य लक्ष्मी क्याम्पसया पुलांम्ह ब्वनामि रूपा शाही, सुकुन्दा साहित्य पालाया कजि रिदेन महर्जन व विशेष पाहां डा. बालगोपाल श्रेष्ठं महाकवि गिरिजा प्रसाद जोशीं च्वयादिगु जनताया सः, म्ये, चिनाख व ज्याझ्वःया सभानायो प्रशान्त डंगोलं नेपाःया समाजय् खनाच्वंगु विसंगत व विकृतियात कयाः चिनाखं वाचन यानादिल ।
अथेहें ज्याझ्वलय् महाकवि गिरिजा प्रसादया जि ख्वयां छु याय् म्ये नेपालभाषाया म्य नेपालभाषाया संगित ख्यलय् नांजाःम्ह म्ये हालामि तेजवती जोशी हालादिगु खः ।
मातृभाषाया बारे जागरण ब्वलंकेगु नितिं नं जूगु उगु ज्याझ्वलय् मेम्ह विशेष पाहाँ यल नेपालभाषा सहजकर्ता पुचः नायः पवित्रकुमार महर्जनं थुगु साहित्यिक ज्याझ्वलं थः प्रभावित जूगुलिं थज्याःगु सिर्जनात्मक ज्यायात निरन्तरता बीमाःगु बिचाः प्वंकादीगु खः ।
साहित्यिक ज्याझ्वःया कजि रिदेन महर्जनं नेपालभाषा अभियानयात निरन्तरता बीत साहित्यिक ज्याझ्वःत ग्वसाः ग्वयागु जानकारी बियादीगु दु ।
अथेहे वय्कलं सक्वय् महाकवि गिरिजाप्रसाद जोशीया पुर्न कद सहित झ्वाता पलिस्था यानाः महाकविया हुलाक टिकट पिथनेमाःगु खँ कनादिल । महाकविया जीवनीपाखें थः प्रभावित जूगु वय्कलं कनादिल । गथे खसभाय्या महाकवि लक्ष्मीप्रसाद देवकोटा व आदिकबि कवि भानुभक्त आचार्यया जन्मजयन्तीयात सरकारं मान्यता बियातःगु दु अथेतुं मातृभाषाया उत्थानय् अतुलनीय योगदान बियादीपिं महान् व्यक्तिपिनिगु जन्मजयन्ती हनेगुलिइ वर्तमान स्थानीय तह व नेपाःया सरकारं नं कन्जुस्याइ याये मम्जूगु खं कनादिल ।
ज्याझ्वलय् मूपाहां संस्कृतबिद् प्रकाशमान शक्वं नेपालभाषाया महाकवि गिरिजाप्रसाद जोशीयात गुरु व सहकर्मीया रुपय् लुमंकाः दिल । वय्कः बहुआयामिकताय् धनी व अपवादात्मक प्रतिभा दुम्ह खः धयादिल । वय्कलं महाकवि जोशीया विशेष यानाः शोषित व उत्पीडित जनतायात लक्षित यानाः च्वयादीगु साहित्यिक कृतिं प्रगतिशील देय् व अनया जनतायात गहिरो प्रभाव लाकेत सफल जूगु धयादिल ।
लिसें महाकवि गिरिजाप्रसाद जोशीं सक्वय् थीथी साहित्यिक ज्याझ्वः ग्वसाः ग्वयेगु व हस्तलिखित पत्रिका पिथनेगु ज्यायात कयाः चर्चा यानादीगु खः ।
ज्याझ्वःया नायः प्रशान्त डंगोलं नेपालभाषा अभियानया व्यस्तताया दथुइ नं ज्याझ्वः ताःलाकेत ग्वाहालि यानादीपिं हनेबहःपिन्त सुभाय् देछासें ज्याझ्वः क्वचायेकादीगु खः ।
