२२ गते देय् दबूपाखें देय्न्यंकं श्रद्धाञ्जली ज्याझ्वः याइगु

 येँ नेवाःतय्गु मंकाःगु राष्ट्रिय संगठन नेवाः देय् दबूपाखें वंगु बुधवाः भोटेकोशी खुसिबाः वया रसुवा, नुवाकोट, धादिङ व चितवन जिल्लाय् विनासकारी खुसिबाः, चलः वंगु व डुबानय् लाना मदुपिनिगु चीर शान्तिया कामना याना झिंस्वन्हुया दिनय् देय्न्यंकं छन्हुं हे श्रद्धाञ्जली ज्याझ्वः याइगु जूगु दु । 

 नेवाः देय् दबूया मूछ्याञ्जे श्रीकृष्ण महर्जनं बियादीगु जानकारी कथं वइगु भदौ २२ गते सोमवार देय्न्यंकं हे बहनी ६ बजे प्राकृतिक विपत्तिइ लाना मदुपिनिगु चीर शान्तिया काना याना देय्न्यंकं छगू हे इलय् श्रद्धाञ्जली ज्याझ्वः याये त्यनागु खः धयादिल । 

 नेवाः देय् दबूया केन्द्रीय समितिया मुँज्याया क्वःछिना कथं मातहतया प्रदेश समिति, जिल्ला समिति, पालिका समिति, वडा समिति, विषयगत समिति व आबद्ध जातीय संगठनयात उगु दिनय् थःथःगु थासय् श्रद्धाञ्जली ज्याझ्वः यायेगु नितिं सर्कुलर तकं जूगु मूछ्याञ्जे महर्जनं कनादिल ।