मातृभाषा दिवस ९ गते भाषा ऐन कार्यान्वयन याकेगु नितिं प्लेकार्ड प्रदर्शन याइगु

 कीपू ।  नेवाः देय् दबू किपू नगर समितिपाखें वइगु अन्तर्राष्ट्रिय मातृभाषा दिवसया दिं फागुन ९ गते शुक्रवाः बागमती प्रदेश भाषा ऐन कार्यान्वयन यायेमाः धकाः मागयासें प्लेकार्ड प्रदर्शन याइगु जूगु दु ।

 नेवाः देय् दबू देय् दबूया स्वनिगः विशेष प्रदेशया नायो  श्रीकृष्ण महर्जनं नेवाः देय् दबू किपू नगर समितिया निक्वःगु अधिवेशनया उलेज्यायासें मूपाहांया नुगःखँ तयेगु इलय् तयादीगु उगु प्रस्तवायात पारित याःगु खः । बागमती प्रदेशं नेपालभाषा व तामाङ भाषायात सरकारी कामकाजि भाषाया रुपय् लागू यायेगु नितिं ऐन दयेका कार्यान्वयन जुल धकाः घोषणा याःगु हे गुला दये धुंकूगु अवस्थाय् नं उकियात लागू मयातच्वंगुलिं प्रदेश सरकार, सांसद व दलतय्त दबाव बिइगु नितिं उगु कथंया प्लेकार्ड ब्वज्या यायेमाःगु खँ मूपाहां महर्जनं तयादीगु खः ।

 थुगु कथंया ज्याझ्वः आः किपू नगर समिति जक मखु फुक्क पालिकापाखें व जिल्लां तकं यायेमाः धकाः तकं धयादिसें वय्कलं भाषा ऐन कार्यान्वन यायेमाः, भाषा ऐन कथं विज्ञ पुचः नीस्वनेमाः, भाषा ऐन कथं प्रतिष्ठान गठन यायेमाः, सुझाव कार्यदलया प्रतिवेदन सार्वजनि याना कार्यान्वन यायेमाःगु नारा च्वया प्रदर्शन यायेमाः धकाः धयादीगु खः । माघ १७ गते विहिवाः किपुलिइ जूगु देय् दबू किपू नगरया निक्वःगु अधिवेशनं उगु कथंया प्रस्तावयात पारित याःगु खः । 

नेपालभाषा स्यनामि दबू नीस्वन

येँ । स्थानीय विषय अन्तर्गत येँ महानगरपालिकाया सामुदायिक ब्वनेकुथी नेपालभाषा विषय ब्वंकाच्वंपिं नेपालभाषा प्रशिक्षण सहायकपिनिगु मंकाः दबू ‘नेपालभाषा स्यनामि दबू’ नीस्वंगु दु । 

नेवाः देय् दबूअन्तर्गत नेपालभाषा स्यनामिपिनिगु कवःकथं  रितेश मल्लया नायाेसुइ थुगु दबू नीस्वंगु खः । 

येँया भानु मा.वि.इ थौं ने.सं. ११४५ पोहेलागा पंचमी, आइतवाः नेवाः देय् दबूया केन्द्रीय नायः पवित्र वज्राचार्यया मू पाहांसुइ दबू नीस्वना ज्याझ्वः क्वचाःगु खः । 

नवगठित दबुली न्वकू सविना महर्जन, मू छ्याञ्जे राकेश महर्जन, छ्याञ्जे सुष्मा डंगोल, मू दांभरि मिला शाक्य, दांभरि अनिल महर्जनपिं च्वनादीगु खः ।

 अथे हे दबूया दुजलय् राम महर्जन, राजेन्द्र महर्जन, रजनी महर्जन, साजना महर्जन, लसता सिं, उर्मिला महर्जन, अनिता शाक्य, ओमकृष्ण श्रेष्ठ, राजु कपाली, सरिता मालाकार, राजेन्द्रलाल महर्जन व राधेश्याम महर्जनपिं च्वनादीगु दु ।

 न्हूगु कार्यसमितिया पदाधिकारीपिन्त नेवाः देय् दबुलिं छगू ज्याझ्वःया दथुइ लसकुस यासें शपथ ग्रहण याकीगु जूगु दु । आःया लागि थुगु दबुली येँ मनपा अन्तर्गतया नेपालभाषा स्यनामिपिं दुथ्याःगु दुसा थुकी यल मनपा, किपू व तोखा नगरपालिकाया सामुदायिक ब्वनेकुथी ब्वंकाच्वंपिं नेपालभाषा स्यनामिपिंत नं दुथ्याकाः नेपालभाषा स्यनामिपिनिगु मंकाः दबू दयेकेगु ग्वसाः दुगु जानकारी स्यनामि दबूया नायः रितेश मल्लं बियादिल । 

मूपाहांया थासं न्ववानादिसें नेवाः देय् दबूया नायः पवित्र वज्राचार्यं नेवाः देय् दबू नेवाःतय्‌गु राष्ट्रिय संगठन जूगुलिं थुकी आपालं पेशागत कवः दुथाय् आः नेपालभाषा स्यनामिपिनिगु नं कवः दुथ्याकेखंगु लसताया खँ जूगु दु धयादिल । दबू नीस्वना ज्याझ्वलय् नेवाः देय् दबूया मू छ्याञ्जे सत्यनारायण डंगोल, स्वनिगः विशेष प्रदेशया नायः श्रीकृष्ण महर्जन, येँ जिल्ला समितिया नायः धनबहादुर महर्जन, येँ जिल्ला समितिया न्वकू श्रीजनमान श्रेष्ठ लिसें नेवाः स्यनामि दबूया छ्याञ्जे वरुणप्रसाद वैद्यपिनि उपस्थिति दुगु खः । 

छन्हुं हे नेवाः देय् दबूया स्वनिगःया प्यंगू नगरपालिकाया अधिवेशन

येँ । नेवाःतय्गु मंकाःगु राष्ट्रिय संगठन नेवाः देय् दबूया वइगु चैत्र महिनाय् सुदुर पश्चिम प्रदेशया कञ्चनपुरय् वइगु चैत्र २१ र २२ गते जूवनाच्वंगु च्याक्वःगु महाधिवेशनया तयारीया झ्वलय् स्वनिगः विशेष प्रदेश अन्तर्गत दुगु स्वंगू जिल्लाय् शनिवाः माघ १२ गते छन्हुं हे प्यंगू पालिकाया अधिवेशन क्वचाःगु दु ।

 नेवाः देय् दबू स्वनिगः विशेष प्रदेशया नायो श्रीकृष्ण महर्जनं बियादीगु जानकारी कथं येँ जिल्लाया कागेश्वरी मनहरा नगरपालिकाय् न्हापांगु अधिवेशन, ख्वप जिल्लाया ख्वप नगरपालिकाय् निक्वःगु अधिवेशन व यल जिल्लाया यल महानगरपालिकाया निक्वःगु अधिवेशन व गोदावरी नगरपालिकाया निक्वःगु अधिवेशन याना प्यंगू हे पालिकाय् न्हूगु नेतृत्व ल्ययेगु ज्या जूगु दु । 

यल जिल्लाया यल महानगरपालिकाया निक्वःगु अधिवेशनं विजयराज शाक्ययात नायो कथं सर्वसम्मतं ल्यःगु दु । अथे हे बरिष्ठ न्वकू शर्मिला महर्जन, न्वकूपिं किरण महर्जन, मिली महर्जन, छ्याञ्जेपिं सुरेन्द्र महर्जन, सुलक्ष्या महर्जन, दांभरी सवर्ण महजृन अथे हे दुजलय् राम महर्जन, सुमित्रा श्रेष्ठ, भगवती महर्जन, धर्मलाल महर्जन, सनिष महर्जन, मिना महर्जन, समिकपुर महर्जन, दिनश महर्जन व मित्र महर्जन सर्वसम्मतं ल्यःगु दु । अथे हे यल जिल्लाया हे नेवाः देय् दबू गोदावरी नगर समितिया निक्वःगु अधिवेशन नं शनिवाः हे क्वचाःगु दु । उगु अधिवेशनं न्हूगु नेतृत्व ल्यःगु दु । नायो राम डंगोल, बरिष्ठ न्वकू उमेश लाल श्रेष्ठ, न्वकूपिं गजेन्द्र महर्जन, रिना माली, छ्याञ्जे शानित डंगोल, दांभरी रामलाल महर्जन व दुजलय् राजेन्द्र देशार, रमण श्रेष्ठ, दशबहादुर महर्जन, शरण महर्जन, हरि महर्जन व राजन शाही सर्वसम्मतं ल्यःगु दु । 

उगु हे कथं नेवाः दय् दबूया येँ जिल्ला अन्तर्गत दुगु कागेश्वरी मनहरा नगर समितिया नं न्हापांगु अधिवेशन जूगु दु । अधिवेशनं सन्तोष श्रेष्ठयात नापं कथं झिंप्यम्हेसिया न्हूगु नेतृत्व ल्यःगु दु । बरिष्ठ न्वकू राजेन्द्र श्रेष्ठ, न्वकूपिं अनिल श्रेष्ठ, सम्झना श्रेष्ठ, छ्याञ्जे श्रीकुमारी श्रेष्ठ, सुशान्त श्रेष्ठ, दांभरी कृष्णमान श्रेष्ठ, दुजलय् कृष्ण श्रेष्ठ, सुदिप श्रेष्ठ, बालकृष्ण नगरकोटी, दिलबहादुर श्रेष्ठ, रोहन श्रेष्ठ, रंजित श्रेष्ठ व दिपेश श्रेष्ठयात ल्यःगु दु । नेवाः देय् दबू ख्वप नगर समितिया निक्वःगु अधिवेशनं नं न्हूगु नेतृत्व ल्ययेगु ज्या जूगु दु । न्हूगु नेतृत्व कथं नायो कृष्णप्रसद प्रजापति, बरिष्ठ न्वकू मिमला शर्मा नापं याना सकल ज्यासना पुचःया दुजःपिं सर्वसम्मत कथं ल्यःगु दु ।

 नेवाः देय् दबू स्वनिगः विशेष प्रदेशं बिउगु जानकारी कथं आः तकया दुने स्वनिगः दुनेया दक्षिणकाली नगर समिति, गोकर्णेश्वर नगर समिति, तोखा नगर समिति, येँ महानगर समिति, महालक्ष्मि नगर समिति, बुढानिलकण्ठ नगर समितिया नं अधिवेशन क्वचायेका न्हूगु नेतृत्व ल्यायेगु ज्या जुइ धुंकूगु दुसा ल्यंदुगु नगर समिति नापं स्वंगू हे जिल्ला समितिया अधिवेशन नं याकनं हे जुइ ।

𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐫𑐵 𑐐𑑂𑐰𑐳𑐵𑐮𑐫𑑂 𑐴𑐣𑐾𑐖𑑂𑐫𑐵 𑐰𑐶𑐡𑐵𑐃 𑐖𑑂𑐫𑐵𑐗𑑂𑐰𑑅 𑐫𑐵𑐟

 𑐫𑐾𑑃 𑑋 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐫𑐵 𑐐𑑂𑐰𑐳𑐵𑐮𑐫𑑂 𑐫𑐾𑑃𑐫𑐵 𑐥𑑂𑐬𑐡𑐬𑑂𑐱𑐣𑐷 𑐩𑐵𑐬𑑂𑐐𑐫𑑂 𑐔𑑂𑐰𑑄𑐐𑐸 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑐵 𑐳𑐨𑐵𑐴𑐮𑐫𑑂 𑐱𑐣𑐶𑐰𑐵𑑅 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐩𑐹𑐥𑐵𑐴𑐵𑑃 𑐎𑐠𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐎𑐵𑐳𑐵𑐩𑐶𑐥𑐶𑐣𑑂𑐟 𑐳𑐩𑑂𑐩𑐵𑐣 𑐫𑐵𑐳𑐾𑑄 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐮𑐳𑐎𑐸𑐳 𑐰 𑐰𑐶𑐡𑐵𑐃 𑐖𑑂𑐫𑐵𑐗𑑂𑐰𑑅 𑐗𑑄 𑐗𑑄 𑐢𑐵𑐫𑐾𑐎 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐰𑑄𑐐𑐸 𑐥𑐸𑐳 𑑒𑑐 𑐐𑐟𑐾 𑐱𑐣𑐶𑐧𑐵 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑑂𑐫𑐵𑐗𑑂𑐰𑐮𑐫𑑂 𑐴𑐶𑐟𑐎𑐬 𑐰𑐷𑐬 𑐳𑐶𑑄 𑐎𑑄𑐳𑐵𑐎𑐵𑐬 𑐰 𑐎𑑂𑐫𑐵𑐩𑑂𑐥𑐳 𑐥𑑂𑐬𑐩𑐸𑐏 𑐥𑑂𑐬𑐵.𑐜𑐵. 𑐖𑐷𑐰𑐣𑐢𑐬 𑐖𑑂𑐘𑐰𑐵𑐮𑐷 𑐰𑐶𑐱𑐾𑐲 𑐥𑐵𑐴𑐵𑑃 𑐎𑐠𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸𑐏𑑅 𑑋 𑐀𑐠𑐾𑐴𑐾, 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐫𑐵 𑐥𑐸𑐮𑐵𑑄𑐥𑐶𑑄 𑐣𑐵𑐫𑑅𑐥𑐶𑑄𑐮𑐶𑐳𑐾𑑄 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐥𑐶𑑄 𑐥𑐵𑐴𑐵𑑃 𑐎𑐠𑑄 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐄𑐥𑐳𑑂𑐠𑐶𑐟 𑐖𑐹𑐐𑐸 𑐏𑑅 𑑋

𑐎𑐬𑐶𑐧 𑐳𑐔𑑂𑐕𑐶𑐩𑑂𑐴𑐾𑐳𑐶𑐣𑑂𑐴 𑐧𑑂𑐰𑐟𑐶 𑐎𑐫𑐵𑐡𑐶𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐳𑐸𑐎𑐸𑐣𑑂𑐡𑐵 𑐔𑑂𑐫𑐵𑐎𑐵𑑅 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑐣𑐵𑐔𑑂𑐰𑑄𑐩𑑂𑐴 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐾𑐥𑐵𑐎𑐟𑐵𑐎𑑂𑐬𑑀 𑐎𑐵𑐳𑐵𑐩𑐶 𑐳𑐸𑐩𑐶𑐟𑑂𑐬𑐵 𑐜𑑄𑐐𑑀𑐮, 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐣𑐾𑐥𑐵𑐮𑐨𑐵𑐲𑐵 𑐳𑐬𑑂𑐰𑑀𑐎𑐺𑐲𑑂𑐚 𑐖𑐸𑐫𑐵𑐡𑐶𑐩𑑂𑐴 𑐳𑑀𑐩𑐷 𑐜𑑄𑐐𑑀𑐮, 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳 𑐣𑐾𑐥𑐵𑐮𑐨𑐵𑐲𑐵 𑐄𑐟𑑂𑐎𑐺𑐲𑑂𑐚 𑐎𑐺𑐟𑐵 𑐧𑐖𑑂𑐬𑐵𑐔𑐵𑐬𑑂𑐫 𑐮𑐶𑐳𑐾𑑄𑐫𑐵𑐥𑐶𑑄 𑐳𑐩𑑂𑐩𑐵𑐣𑐶𑐟 𑐖𑐹𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐳𑑂𑐣𑐵𑐟𑐎 𑐟𑐴𑐮𑐫𑑂 𑐧𑑂𑐰𑐣𑐾𑐟 𑐨𑐬𑑂𑐣𑐵 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐮𑐳𑐎𑐸𑐳 𑐫𑐵𑑅𑐐𑐸 𑐮𑐶𑐳𑐾𑑄 𑐳𑑂𑐣𑐵𑐟𑐎 𑐰 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐮𑐫𑑂 𑐠𑑅𑐥𑐶𑐣𑐶𑐐𑐸 𑐀𑐢𑑂𑐫𑐫𑐣 𑐥𑐹𑐰𑑄𑐎𑐹𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑐣𑑂𑐟 𑐧𑐶𑐡𑐵𑐃 𑐫𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐫𑐵 𑐕𑑂𑐫𑐵𑐘𑑂𑐖𑐾 𑐬𑐶𑐡𑐾𑐣 𑐩𑐴𑐬𑑂𑐖𑐣𑑄 𑐣𑐾𑐥𑐵𑑅𑐫𑐵 𑐀𑐳𑑂𑐟𑐶𑐟𑑂𑐰 𑐰 𑐂𑐟𑐶𑐴𑐵𑐳𑐮𑐶𑐳𑐾 𑐟𑐥𑑂𑐫𑑄𑐎 𑐳𑑂𑐰𑐵𑐥𑐹 𑐡𑐹𑐐𑐸 𑐣𑐾𑐰𑐵𑑅 𑐖𑐵𑐟𑐶 𑐰 𑐨𑐵𑐲𑐵𑐫𑐵 𑐟𑑅𑐢𑑄𑐐𑐸 𑐩𑐴𑐟𑑂𑐰 𑐡𑐹𑐐𑐸 𑐢𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐫𑐣 𑐳𑑂𑐣𑐵𑐟𑐎 𑐰 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐮𑐫𑑂 𑐥𑐹𑐰𑑄𑐎𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶𑐐𑐸 𑐄𑐖𑑂𑐖𑑂𑐰𑐮 𑐨𑐰𑐶𑐲𑑂𑐫𑐫𑐵 𑐎𑐵𑐩𑐣𑐵 𑐫𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐕𑑂𑐫𑐵𑐘𑑂𑐖𑐾 𑐩𑐴𑐬𑑂𑐖𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐟 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐳𑑂𑐣𑐵𑐟𑐎 𑐟𑐴𑐮𑐫𑑂 𑐨𑐬𑑂𑐣𑐵 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑃 𑐎𑑂𑐫𑐵𑐩𑑂𑐥𑐳 𑐥𑑂𑐬𑐩𑐸𑐏 𑐥𑑂𑐬𑐵.𑐜𑐵. 𑐖𑐷𑐰𑐣𑐢𑐬 𑐖𑑂𑐘𑐰𑐵𑐮𑐷𑑄 𑐨𑐵𑐲𑐵 𑐡𑑅𑐳𑐵 𑐖𑐎 𑐕𑐸𑑄 𑐣𑑄 𑐖𑐵𑐟𑐶𑐫𑐵 𑐀𑐳𑑂𑐟𑐶𑐟𑑂𑐰 𑐡𑐂𑐐𑐸 𑐖𑐹𑐐𑐸𑐮𑐶𑑄 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣 𑐰 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐣𑐾𑐥𑐵𑐮𑐨𑐵𑐲𑐵 𑐀𑐨𑐶𑐫𑐣𑑂𑐟𑐵 𑐥𑑂𑐬𑐱𑐵𑐣𑑂𑐟 𑐜𑑄𑐐𑑀𑐮, 𑐬𑐶𑐡𑐾𑐣 𑐩𑐴𑐬𑑂𑐖𑐣 𑐮𑐶𑐳𑐾𑑄𑐫𑐵 𑐀𑐨𑐶𑐫𑐣𑑂𑐟𑐵𑐥𑐶𑐣𑐶𑐐𑐸 𑐥𑐴𑐮𑐎𑐡𑐩𑐷𑐫𑐵 𑐏𑐸𑐮𑐳𑑂𑐟 𑐖𑐸𑐫𑐵𑑅 𑐥𑑂𑐬𑐱𑑄𑐳𑐵 𑐫𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣𑐫𑑂 𑐕𑐸𑑄 𑐣𑑄 𑐎𑐩𑐷 𑐎𑐩𑐖𑑀𑐬𑐷 𑐖𑐸𑐂𑐎𑐾 𑐩𑐧𑐶𑐂𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋
𑐀𑐠𑐾𑐴𑐾, 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑃 𑐴𑐶𑐟𑐎𑐬 𑐰𑐷𑐬 𑐳𑐶𑑄 𑐎𑑄𑐳𑐵𑐎𑐵𑐬𑑄 𑐦𑐸𑐎𑑂𑐎 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐟 𑐣𑐶𑐲𑑂𑐎𑑂𑐬𑐶𑐫 𑐖𑐹𑐐𑐸 𑐀𑐰𑐳𑑂𑐠𑐵𑐫𑑂 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅 𑐴𑐵𑐎𑐣𑑄 𑐣𑐷𑐳𑑂𑐰𑐣𑐵𑑅 𑐠𑐷𑐠𑐷 𑐎𑑂𑐬𑐶𑐫𑐵𑐎𑐮𑐵𑐥 𑐫𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑐣𑑂𑐟 𑐁𑐎𑐬𑑂𑐲𑐞 𑐫𑐵𑐳𑐾𑑄 𑐰𑐫𑐵𑐔𑑂𑐰𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐣𑐾𑐥𑐵𑐮𑐨𑐵𑐲𑐵 𑐀𑐨𑐶𑐫𑐣𑑂𑐟𑐵𑐥𑐶𑐣𑐶𑐐𑐸 𑐥𑐴𑐮𑐫𑑂 𑐳𑑂𑐣𑐵𑐟𑐎 𑐰 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐫𑐵 𑐀𑐢𑑂𑐫𑐵𑐥𑐣 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐖𑐸𑐫𑐵𑐔𑑂𑐰𑑄𑐐𑐸𑐫𑐵𑐟 𑐎𑐫𑐵𑑅 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐳 𑐧𑑂𑐰𑐣𑐵𑐩𑐶𑐥𑐶𑐣𑑂𑐟 𑐁𑐎𑐬𑑂𑐲𑐞 𑐫𑐵𑐫𑐾𑐟 𑐰 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐥𑐶𑐣𑑂𑐟 𑐥𑑂𑐬𑑀𑐟𑑂𑐳𑐵𑐴𑐣 𑐫𑐵𑐫𑐾𑐟 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣 𑐣𑐶𑐬𑐣𑑂𑐟𑐬𑐟𑐵 𑐫𑐵𑐫𑐾𑐟 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐖𑐎 𑐁𑐱𑐵 𑐩𑐫𑐵𑐳𑐾 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣𑐫𑐵 𑐣𑐶𑐟𑐶𑑄 𑐃 𑐎𑐠𑑄 𑐩𑐵𑑅𑐐𑐸 𑐥𑐹𑐬𑑂𑐰𑐵𑐢𑐵𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐟 𑐎𑑂𑐫𑐵𑐩𑑂𑐥𑐳 𑐥𑑂𑐬𑐱𑐵𑐳𑐣𑑄 𑐐𑐸𑐮𑐶 𑐦𑐸 𑐄𑐮𑐶 𑐫𑐵𑐎𑐣𑑄 𑐳𑑂𑐠𑐵𑐫𑐷 𑐡𑐬𑐧𑐣𑑂𑐡𑐷𑐫𑐵 𑐩𑐵𑐐 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐳𑑂𑐠𑐵𑐫𑐶𑐟𑑂𑐰 𑐧𑐶𑐂𑐟 𑐥𑐴𑐮𑐎𑐡𑐩 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐜𑑄𑐐𑑀𑐮𑑄 𑐠𑐠𑐾 𑐫𑐵𑐫𑐾𑐧𑐮𑐫𑑂 𑐧𑑂𑐰𑐣𑐵𑐩𑐶, 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐥𑐶𑐣𑑂𑐟 𑐳𑐸𑐰𑐶𑐢𑐵 𑐖𑐸𑐂𑐐𑐸 𑐮𑐵 𑐖𑐸𑐮, 𑐎𑑂𑐫𑐵𑐩𑑂𑐥𑐳 𑐁𑐟𑑂𑐩𑐣𑐶𑐬𑑂𑐨𑐬 𑐖𑐸𑐫𑐵𑑅 𑐳𑑄𑐔𑐵𑐮𑐣 𑐫𑐵𑑅𑐐𑐸 𑐰𑐶𑐲𑐫𑐥𑐵𑐏𑐾𑑄 𑐳𑐩𑐵𑐖 𑐰 𑐡𑐾𑐱𑐫𑑂 𑐧𑑂𑐫𑐵𑐐𑐮𑑄 𑐥𑑂𑐬𑐨𑐵𑐰 𑐮𑐵𑐂𑐐𑐸 𑐖𑐸𑐫𑐵𑑅 𑐣𑐶𑐎𑐚 𑐨𑐰𑐶𑐲𑑂𑐫𑐫𑑂 𑐴𑐾 𑐩𑐵𑑅𑐐𑐸 𑐡𑐬𑐧𑐣𑑂𑐡𑐷𑐫𑐵 𑐩𑐵𑐐 𑐫𑐵𑐣𑐵𑑅 𑐰𑑂𑐫𑐰𑐳𑑂𑐠𑐶𑐟 𑐟𑐰𑐬𑑄 𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐵𑐥𑐣 𑐣𑑂𑐴𑑂𑐫𑑅𑐣𑐾 𑐰𑑄𑐐𑐸 𑐳𑑂𑐰𑐫𑐾𑐐𑐸 𑐂𑐔𑑂𑐕𑐵 𑐡𑐹𑐐𑐸 𑐰 𑐄𑐐𑐸 𑐖𑑂𑐫𑐵𑐫𑐵 𑐣𑐶𑐟𑐶𑑄 𑐠𑑅𑐐𑐸𑐥𑐵𑐏𑐾𑑄 𑐫𑐵𑐫𑐾𑐩𑐵𑑅𑐐𑐸 𑐳𑐎𑐟𑐵 𑐐𑑂𑐰𑐵𑐴𑐵𑐮𑐶 𑐰 𑐳𑐵𑐠 𑐡𑐂 𑐢𑐿𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐮𑐫𑑂 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐧𑑂𑐫𑐵𑐔 𑐰𑐶.𑐳𑑄. 𑑒𑑐𑑗𑑘 𑐳𑐵𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐧𑑂𑐰𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐮𑐫𑑂 𑐡𑐎𑐮𑐾 𑐀𑐥𑑂𑐰𑑅 𑐮𑑂𑐫𑐵𑑅 𑐴𑐫𑐵𑑅 𑐳𑐬𑑂𑐰𑑀𑐎𑐺𑐲𑑂𑐚 𑐖𑐸𑐫𑐵𑐡𑐷𑐩𑑂𑐴 𑐎𑐺𑐟𑐵 𑐧𑐖𑑂𑐬𑐵𑐔𑐵𑐬𑑂𑐫𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾 𑐀𑐟𑐶𑐎𑑄 𑐣𑑂𑐴𑑂𑐫𑐵𑐥𑐸𑐐𑐸 𑐰𑐶𑐲𑐫 𑐖𑐹𑐐𑐸 𑐢𑐵𑐥𑐹 𑐟𑐫𑐵𑐡𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐩𑐵𑑄𑐨𑐵𑐳𑑄 𑐊𑐩𑐊 𑐟𑐐𑐶𑑄 𑐧𑑂𑐰𑐣𑐾𑐧𑐮𑐫𑑂𑐀𑑅𑐥𑐸𑐎 𑐠𑐸𑐂𑐎𑐵 𑐎𑐵𑐫𑐾𑐦𑐂𑐐𑐸𑐮𑐶𑐳𑐾𑑄 𑐔𑑂𑐰𑐫𑐾 𑐦𑐂𑐐𑐸 𑐖𑐹𑐐𑐸𑐮𑐶𑑄 𑐥𑐵𑐳 𑐫𑐵𑐫𑐾 𑐀𑐥𑐸𑐂𑐐𑐸 𑐰𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐊𑐩𑐊 𑐟𑐐𑐶𑐩𑐫𑑂 𑐠𑐷𑐠𑐷 𑐰𑐶𑐲𑐫𑐟 𑐎𑑅𑐑𑐵𑐣𑐵𑐟𑑅𑐐𑐸 𑐐𑐠𑐾𑐎𑐶, 𑐥𑐵𑐱𑑂𑐔𑐵𑐟𑑂𑐫 𑐳𑐩𑐵𑐮𑑀𑐔𑐣𑐵, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑐶𑐳𑐵, 𑐂𑐟𑐶𑐴𑐵𑐳, 𑐢𑐬𑑂𑐩 𑐡𑐬𑑂𑐱𑐣 𑐂𑐟𑑂𑐫𑐵𑐡𑐷 𑐰𑐶𑐲𑐫𑐟 𑐎𑑅𑐑𑐵𑐣𑐵𑐟𑑅𑐐𑐸𑐮𑐶𑑄 𑐁𑐥𑐵𑐮𑑄 𑐖𑑂𑐘𑐵𑐣 𑐎𑐵𑐫𑐾𑐦𑐂𑐐𑐸 𑐏𑑃 𑐟𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾𑐴𑐾 𑐜𑐶𑐐𑑂𑐬𑐷 𑐣𑑄 𑐩𑐾𑐩𑐾𑐐𑐸 𑐰𑐶𑐲𑐫𑐠𑐾𑑄 𑐀𑐟𑐶𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐂𑐢𑐸𑑄𑐎𑐹𑐐𑐸 𑐢𑐵𑐳𑐾𑑄 𑐀𑐥𑑂𑐰𑑅 𑐮𑑂𑐫𑐵𑑅 𑐴𑑅𑐥𑐶𑐣𑑂𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐣𑑄 𑐧𑑂𑐫𑐹𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐚𑐥𑐬 𑐎𑐺𑐟𑐵 𑐧𑐖𑑂𑐬𑐵𑐔𑐵𑐬𑑂𑐫𑑄 𑐠𑐸𑐖𑑂𑐰𑑅𑐐𑐸 𑐖𑑂𑐫𑐵𑐗𑑂𑐰𑑅𑐫𑐵𑐟 𑐳𑐡𑐵𑑄 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐰𑐣𑐾𑐩𑐵𑑅𑐐𑐸 𑐏𑑃 𑐟𑐳𑐾𑑄 𑐁𑑅 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐣𑑂𑐴𑐹𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑐣𑑂𑐟 𑐴𑑅𑐥𑐵𑑅 𑐟𑐶𑐧𑑅 𑐧𑐶𑐂𑐩𑐵𑑅𑐐𑐸 𑐰𑐶𑐔𑐵𑑅 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐧𑐖𑑂𑐬𑐵𑐔𑐵𑐬𑑂𑐫𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑐣𑐵 𑐡𑐎𑐮𑐾 𑐟𑑅𑐢𑑄𑐐𑐸 𑐄𑐥𑐮𑐧𑑂𑐢𑐷 𑐢𑐿𑐐𑐸 𑐴𑐾 𑐮𑐖𑐐𑐵𑑅 𑐔𑐹𑐮𑐵𑑅𑐐𑐸 𑐏𑑃 𑐏𑑅 𑐢𑐎𑐵𑑅 𑐢𑐫𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮 𑐨𑐵𑐲𑐵 𑐧𑑂𑐰𑐣𑐾𑐐𑐸 𑐮𑑃𑐎𑐳 𑐡𑐫𑐾 𑐢𑐸𑐎𑑄𑐮 𑐖𑐶 𑐎𑐣𑐵𑐐𑐸 𑑖𑑕 𑐡𑑃𑐫𑐵 𑐣𑑂𑐴𑑂𑐫𑑅 𑐀𑐫𑑂𑐣𑑄 𑐣𑐾𑐥𑐵𑐮𑐨𑐵𑐲 𑐡𑐸𑐠𑑂𑐫𑐵𑐎𑐾𑐟 𑐮𑑂𑐰𑐵𑐫𑑂𑐩𑐵𑑅 𑐧𑑂𑐰𑐣𑐶𑐂𑐥𑐶𑑄 𑐧𑑂𑐰𑐣𑐶𑐂𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑑄 𑐩𑐡𑐫𑐵 𑐰𑐵𑐠 𑐰𑐵𑐠 𑐎𑑄 𑐠𑑂𑐰 𑐐𑐠𑐾𑑄 𑐐𑐫𑑂 𑐖𑐹𑐐𑐸 𑐬𑐸

𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐱𑐾𑐲 𑐥𑐵𑐴𑐵𑑃 𑐀𑐣𑑂𑐟𑐬 𑐎𑐮𑐾𑐖 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐥𑐵𑑅𑐮𑐵𑑅𑐫𑐵 𑐩𑐹𑐳𑑄𑐳𑑂𑐠𑐵𑐥𑐎 𑐣𑐵𑐫𑑀, 𑐧𑐬𑐶𑐲𑑂𑐛 𑐱𑐶𑐎𑑂𑐲𑐵𑐧𑐶𑐡𑑂, 𑐣𑐾𑐰𑐵𑑅 𑐣𑑂𑐴𑐹𑐮𑐸𑐰𑐵, 𑐴𑐶𑐟𑐎𑐬𑐧𑐶𑐬 𑐳𑐶𑑄𑐴 𑐎𑑄𑐳𑐵𑐎𑐵𑐬𑑄 𑐮𑑀𑐎𑐟𑐣𑑂𑐟𑑂𑐬 𑐐𑐞𑐟𑐣𑑂𑐟𑑂𑐬 𑐰𑐫𑐾 𑐢𑐸𑑄𑐎𑐮 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐵𑐩𑐶𑐥𑐶𑑄 𑐩𑐣𑑂𑐟 𑐢𑐵𑑅𑐳𑐵𑑅 𑐗𑐷𑐴𑐾 𑐩𑐕𑐵𑐳𑐾 𑐔𑑂𑐰𑐣𑐾𑐩𑐵𑐮𑐶𑐐𑐸 𑐢𑐵𑐥𑐹 𑐟𑐳𑑄 𑐰𑐫𑑂𑐎𑐮 𑐠𑐸𑐐𑐸 𑐎𑑂𑐫𑐵𑐩𑑂𑐥𑐳𑐫𑑂 𑐊𑐩𑑋 𑐊𑑋 𑐟𑐎𑑂𑐎 𑐣𑐾𑐥𑐵𑐮𑐨𑐵𑐲𑐵 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐐𑐸𑐣𑑄 𑐴𑐵𑐮𑐟𑐫𑑂 𑐳𑑂𑐫𑑄𑐎𑐾 𑐩𑐖𑑂𑐫𑐹𑐐𑐸 𑐢𑐫𑐵𑐡𑐶𑐮 𑑋
𑐀𑐠𑐾𑐴𑐾 𑐰𑐫𑑂𑐎𑐮𑑄 𑐣𑐾𑐰𑐵𑑅 𑐖𑐵𑐟𑐶, 𑐟𑐖𑐶𑐮𑐖𑐶 𑐨𑐵𑐲𑐵 𑐠𑐎𑐵𑐫𑐾𑐟 𑐗𑐷𑐥𑐶𑑄 𑐳𑐎𑑂𑐮𑐾 𑐕𑐥𑑂𑐥𑑃 𑐕𑐢𑐶 𑐖𑐸𑐫𑐵 𑐣𑑂𑐴𑑂𑐫𑐔𑐶𑐮𑐾𑐟 𑐧𑐴𑐧𑐶𑐫𑐵𑐡𑐶𑐮 𑑋
𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐣𑐵𑐫𑑅 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑐮𑐵𑑅𑐫𑐵 𑐣𑐵𑐫𑑅 𑐥𑑂𑐬𑐱𑐵𑐣𑑂𑐟 𑐜𑑄𑐐𑑀𑐮𑑄 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸𑐫𑐵 𑐩𑐹 𑐁𑐖𑑂𑐖𑐸 𑐣𑐾𑐥𑐵𑐮𑐨𑐵𑐲𑐷𑐥𑐶𑐣𑐶𑐐𑐸 𑐧𑐴𑐸𑐩𑐹𑐮𑑂𑐫 𑐳𑐩𑑂𑐥𑐟𑑂𑐟𑐶 𑐨𑐵𑐲𑐵, 𑐎𑐮𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶, 𑐳𑑄𑐳𑑂𑐎𑐵𑐬, 𑐳𑐩𑑂𑐥𑐡𑐵𑐫𑐵 𑐀𑐢𑑂𑐫𑐫𑐣 𑐀𑐢𑑂𑐫𑐵𑐫𑐥𑐣 𑐫𑐵𑐫𑐾𑐟 𑐳𑐴𑐖 𑐮𑐎𑐳 𑐡𑐫𑐾𑐎𑐾𑐟, 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐁𑐎𑐬𑑂𑐲𑐞 𑐫𑐵𑐫𑐾𑐟 𑐮𑐶𑐳𑐾𑑄 𑐄𑐐𑐸 𑐣𑐾𑐰𑐵𑑅 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞 𑐳𑐩𑑂𑐰𑐬𑑂𑐡𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐟 𑐣𑐾𑐰𑐵𑑅 𑐏𑐮𑑅 𑐥𑐸𑐔𑑅𑐫𑐵𑐟 𑐑𑑂𑐰𑐵𑐫𑐾𑐐𑐸 𑐰 𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐶𑐡𑑂𑐰𑐵𑐣 𑐰𑐶𑐡𑐸𑐲𑐷𑐥𑐶𑐣𑑂𑐳𑑄 𑐨𑐵𑐲𑐵, 𑐎𑐮𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶 𑐮𑐵𑐐𑐵𑐫𑑂 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵 𑐄𑐔𑐶𑐟 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐰𑐫𑑂𑐎𑑅𑐥𑐶𑐣𑐶𑐐𑐸𑐥𑐵𑐏𑐾𑑄 𑐔𑑂𑐰𑐫𑐵𑐡𑐷𑐐𑐸 𑐧𑐴𑐸𑐩𑐹𑐮𑑂𑐫 𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐀𑐥𑑂𑐬𑐎𑐵𑐱𑐶𑐟 𑐎𑐺𑐟𑐶𑐟 𑐣𑐾𑐥𑐵𑐮𑐨𑐵𑐲 𑐊𑐎𑐾𑐡𑐾𑐩𑐶𑐥𑐵𑐏𑐾𑑄 𑐥𑑂𑐬𑐎𑐵𑐱𑐣𑐫𑑂 𑐴𑐫𑐾𑐟 𑐳𑐣𑑂𑐡𑐾𑐱 𑐧𑐶𑐂𑐟 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅 𑐳𑑄𑐐𑐷𑐟𑐎𑑅𑐩𑐶𑐮𑐶𑐳𑐾𑑄 𑐮𑐶𑐥𑐶 𑐀𑐨𑐶𑐫𑐣𑑂𑐟𑐵 𑐥𑐰𑐶𑐟𑑂𑐬 𑐎𑐳𑐵𑑅 𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋